ភ្នំពេញ៖ ក្រសួងប្រៃសណីយ និងអាជ្ញាធរសេវាហិរញ្ញវត្ថុមិនមែនធនាគារ បានបោះជំហានមួយទៀតលើកិច្ចសហប្រតិបត្តិការក្នុងការអភិវឌ្ឍវិស័យហិរញ្ញវត្ថុមិនមែនធនាគារ ដែលស្របតាមបរិការណ៍ឌីជីថលូបនីយកម្មនៅកម្ពុជា តំបន់ និងសកល។ ការអភិវឌ្ឍនេះ ធ្វើឡើងតាមរយៈដាក់ឱ្យប្រើថ្នាលផ្ទៀងផ្ទាត់ឯកសាររបស់រាជរដ្ឋាភិបាល verify.gov.kh និងការរៀបចំវគ្គបណ្តុះបណ្តាលជំនាញឌីជីថល ដែលស្ថាប័នរដ្ឋាភិបាលទាំងពីរ បានចុះអនុស្សរណៈនៃការយោគយល់ (MOU) រួមគ្នា។

បើតាមសេចក្តីប្រកាសព័ត៌មានរួមគ្នារវាងក្រសួងប្រៃសណីយនិងទូរគមនាគមន៍ និងអាជ្ញាធរសេវាហិរញ្ញវត្ថុមិនមែនធនាគារ ការចុះ MOU កាលពីថ្ងៃទី២៩ ខែវិច្ឆិកា ឆ្នាំ២០២៤នេះ ផ្តោតសំខាន់ការលើកកម្ពស់ការយល់ដឹងនិងការប្រើថ្នាលផ្ទៀងផ្ទាត់ឯកសាររបស់រាជរដ្ឋាភិបាល verify.gov.kh ដែលអភិវឌ្ឍន៍ដោយក្រសួងប្រៃសណីយ, ការអភិវឌ្ឍសមត្ថភាព គុណវុឌ្ឍិ និងជំនាញដល់មន្ត្រី តាមរយៈការរៀបចំវគ្គបណ្តុះបណ្តាលជំនាញឌីជីថល និងការជំរុញការធ្វើបរិវត្តកម្មរដ្ឋាភិបាលឌីជីថល។

តាមរយៈ MOU នេះ ក៏ជាការឆ្លើយតបទៅនឹងសកម្មភាពអាទិភាពនៃក្របខ័ណ្ឌយុទ្ធសាស្រ្តដែលមានកំណត់ក្នុងគោលនយោបាយរដ្ឋាភិបាលឌីជីថលកម្ពុជា២០២២-២០៣៥ និងបញ្ចកោណទី៥ នៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភាផងដែរ។ យុទ្ធសាស្រ្តបញ្ចកោណ ដំណាក់កាលទី១នេះ បានកំណត់យកអាទិភាព ៥ គឺមនុស្ស ផ្លូវ ទឹក ភ្លើង និងបច្ចេកវិទ្យា ជាពិសេស បច្ចេកវិទ្យាឌីជីថល សម្រាប់ឆ្លើយតបទៅនឹងបដិវត្តន៍ឧស្សាហកម្ម ៤.០ និងបរិវត្តកម្មឌីជីថលនៃសេដ្ឋកិច្ចនិងសង្គមកម្ពុជា៕