ភ្នំពេញ៖ តម្លៃលក់រាយប្រេងសាំងធម្មតាបានឡើងថ្លៃ ៥០រៀល គឺ ៤,៣០០រៀល/លីត្រ ចំណែកឯតម្លៃប្រេងម៉ាស៊ូតវិញ ស្ថិតនៅតម្លៃដដែល គឺ ៤,២០០រៀល/លីត្រ។ នេះបើតាមសេចក្តីជូនដំណឹងអំពីការកំណត់ថ្លៃលក់រាយប្រេងឥន្ធនៈ នៅតាមស្ថានីយទូទាំងប្រទេស ដែលក្រសួងពាណិជ្ជកម្មចុះផ្សាយនាថ្ងៃទី១១ ខែកក្កដា ឆ្នាំ២០២៤នេះ។

បើតាមសេចក្តីប្រកាសរបស់ក្រសួងពាណិជ្ជកម្មដដែល តម្លៃអតិបរមាលក់រាយប្រេងឥន្ធនៈនៅតាមស្ថានីយលក់រាយប្រេងឥន្ធនៈទាំងអស់ គឺសម្រាប់អនុវត្តក្នុងរយៈពេល ១០ថ្ងៃ ចាប់ពីថ្ងៃទី១១ ដល់ថ្ងៃទី២០ ខែកក្កដា ឆ្នាំ២០២៤ ខណៈដែលកាលពី ១០ថ្ងៃមុន សាំងធម្មតាមានតម្លៃ ៤,២៥០រៀល/លីត្រ និងប្រេងម៉ាស៊ូតមានតម្លៃ ៤,២០០រៀល/លីត្រ៕