ភ្នំពេញ៖ អគ្គនាយកដ្ឋានសហគ្រាសធុនតូច និងមធ្យម (SMEs) និង​សិប្ប​កម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍  និងធនាគារ​សហគ្រាស​ធុនតូច និងមធ្យម (SMEs) កម្ពុជា បានចុះហត្ថលេខាលើអនុស្សរណៈនៃការយោគយល់គ្នា (MOU)​ ដើម្បីបង្កើន​លទ្ធ​ភាព​ទទួលបានហិរញ្ញប្បទាន​ និងការជំរុញកំណើនដល់សហគ្រាសធុនតូច និងមធ្យម និងធុរកិច្ចថ្មី។​

បើតាមការចុះផ្សាយរបស់ក្រសួងឧស្សាហកម្ម នាថ្ងៃទី២៧ ខែមិថុនា ឆ្នាំ២០២៤​​​ គំនិតផ្តួចផ្តើមនេះ​ គឺគាំទ្រ​ដល់​កិច្ចខិតខំប្រឹងប្រែងរបស់ភាគីទាំងពីរ ក្នុងការលើកកម្ពស់ស្ថិរភាព និង​ការពង្រីក​អាជីវកម្ម ដើម្បីសហគ្រាស SMEs អាចរួមចំណែកកាន់តែប្រសើរ​ដល់ការ​អភិវឌ្ឍន៍សង្គម-សេដ្ឋកិច្ចរបស់​កម្ពុជា។​ ភាពជាដៃគូនេះ នឹងអនុញ្ញាតឱ្យភាគីទាំងពីរសម្របសម្រួលដល់ការផ្តល់ហិរញ្ញប្បទានដល់សហគ្រាសធុនតូច និងមធ្យម រួមទាំងចែករំលែកព័ត៌មាន ដើម្បីគាំទ្រសហគ្រាសឱ្យចាប់ផ្តើមពង្រីក និងស្តារប្រតិបត្តិការរបស់ពួកគេប្រកបដោយនិរន្តរភាព។ 

អនុស្សរណៈនេះ​ ក៏មានគោលបំណងផ្តល់អត្ថប្រយោជន៍ដល់សហគ្រាសធុនតូច និងមធ្យម​ នៅក្នុង​វិស័យអាទិភាព ដែលរួមមានការកែច្នៃកសិផល វិស័យកម្មន្តសាល និងធុរកិច្ចថ្មីផ្នែកបច្ចេកវិទ្យាផងដែរ។ ភាគីទាំងពីរ នឹងធ្វើការរួមគ្នាលើកកម្ពស់ការយល់ដឹងអំពីនីតិវិធីនៃការទទួលបានហិរញ្ញប្បទាន និងអនុលោមភាពសម្រាប់សហគ្រាសធុនតូច និងមធ្យម។ ភាពជាដៃគូនេះ គឺជាជំហានដ៏សំខាន់មួយដើម្បីគាំទ្រវិស័យសហគ្រាសធុនតូច និង​មធ្យម​នៅកម្ពុជា ដោយផ្តោតលើសារសំខាន់នៃលទ្ធភាពទទួលបានសេវាហិរញ្ញវត្ថុផ្លូវការ និង​តួនាទី​របស់សហគ្រាសធុនតូច និងមធ្យមក្នុងកំណើនសេដ្ឋកិច្ច និងការអភិវឌ្ឍរបស់​កម្ពុជា៕