ភ្នំពេញ៖ រយៈពេល ៥ខែ នៃឆ្នាំ២០២៤ កំពង់ផែស្វយ័តភ្នំពេញ រកចំណូលបានជាង ១៤,៤១លានដុល្លារ ដែលមានការកើនឡើងចំនួន ១០% បើធៀបនឹងរយៈពេលដូចគ្នាក្នុងឆ្នាំ២០២៣ មានទំហំទឹកប្រាក់ ១៣,១១លានដុល្លារ។ នេះបើយោងតាមសេចក្តីប្រកាសរបស់កំពង់ផែស្វយ័តភ្នំពេញ នាថ្ងៃទី១១ មិថុនា។

បើតាមរបាយការណ៍របស់កំពង់ផែស្វយ័តភ្នំពេញ ដែលមិនទាន់បានធ្វើសវនកម្ម បានឱ្យដឹងថា ចំណូលដែលប្រមូលបានជាង ១៤,៤១លានដុល្លារនេះ រួមមាន៖ ចំណូលពីប្រតិបត្តិការផែ(Port Operation) មានចំនួនជាង ១១,៦៨លានដុល្លារ, ចំណូលពីអាជ្ញាធរផែ (Port Authority) មានទំហំជាង ២,០៩ លានដុល្លារ និងចំណូលពីសេវាកម្មផ្សេងៗ (Other Services) មានទឹកប្រាក់ជាង ៦៣៧ ពាន់ដុល្លារ។

បើតាមសេចក្តីប្រកាសរបស់កំពង់ផែស្វយ័តភ្នំពេញ បានបញ្ជាក់ឱ្យដឹងថា ក្នុងខែឧសភា ឆ្នាំ២០២៤នេះ កំពង់ផែស្វយ័តភ្នំពេញ ទទួលបានចំណូលបានជាង ៣,១៥លានដុល្លារ ដែលមានការថយចុះចំនួន ០,៤% បើធៀបនឹងរយៈពេលដូចគ្នាក្នុងឆ្នាំ២០២៣ ដែលមានទំហំ ៣,១៦លានដុល្លារ៕