ភ្នំពេញ៖ ម្ចាស់ក្រុមហ៊ុន/សហគ្រាសចំនួន៥ ដែលប្រកបអាជីវកម្មបញ្ចាំ និងប្រាតិភោគ ដោយអនុប្បទាន ដោយគ្មានអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ (ន.អ.ប.) ប្រឈមមុខនឹងវិធានការតឹងរ៉ឹងតាមផ្លូវច្បាប់ ប្រសិននៅបន្តគេចវេះមិនបង់ប្រាក់ផាកពិន័យ ១០លានរៀល/អាជីវកម្ម។

បើតាម ន.អ.ប. អាជីវកម្មគ្មានអាជ្ញាបណ្ណចំនួន៥ រួមមាន៖ សហគ្រាស ហាងបញ្ចាំ អ៊ុហ្ស៊ី វិលីណា នៅសង្កាត់ស្លក្រាម ក្រុងសៀមរាប ខេត្តសៀមរាប, សហគ្រាស បញ្ចាំ ភ័យ រ៉ាយ ភី ស្ថិតនៅសង្កាត់សាលាកំរើក ក្រុងសៀមរាប ខេត្តសៀមរាប, ក្រុមហ៊ុន មេហ្គា ហ្វាយនែន សាខាស្វាយលើ សង្កាត់ស្វាយលើ ស្រុកស្វាយលើ ខេត្តសៀមរាប, សហគ្រាស ហាងបញ្ចាំ បង រិទ្ធី នៅសង្កាត់ផ្សារកណ្តាលទី២ ខណ្ឌដូនពេញ រាជធានីភ្នំពេញ និងចែឌី ទទួលបញ្ចាំ គ្រឿងអលង្ការ នៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

អាជីវកម្មចំនួន៥នេះ ត្រូវមកបង់ប្រាក់ផាកពិន័យក្នុងរយៈពេល ១៥ថ្ងៃ ចាប់ពីថ្ងៃទី៣១ ខែឧសភា ឆ្នាំ២០២៤តទៅ ជាកំហិត។ ន.អ.ប. បានចេញលិខិតផាកពិន័យ និងលិខិតក្រើនរំលឹកការបង់ប្រាក់ផាកពិន័យចំពោះការប្រព្រឹត្តល្មើសខាងលើរួចមកហើយ ប៉ុន្តែរហូតមកដល់ពេលនេះ ម្ចាស់អាជីវកម្មទាំង៥ មិនទាន់បានបង់ប្រាក់ផាកពិន័យនៅឡើយ។ នេះជាការបញ្ជាក់របស់ ន.អ.ប. កាលពីថ្ងៃទី៣១ ខែឧសភា ឆ្នាំ២០២៤៕