ភ្នំពេញ៖ ការថ្ពក់សហគ្រាសក្នុងស្រុកចូលទៅក្នុងខ្សែច្រវាក់ផ្គត់ផ្គង់នៃឧស្សាហកម្មធំៗ (Backward linkages) នឹងបង្កើនភាពធន់ដល់ខ្សែច្រវាក់ផលិតកម្មនៃវិស័យឧស្សាហកម្មកម្ពុជា។ នេះជាការលើកឡើងរបស់ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃទី២៧ ខែឧសភា ឆ្នាំ២០២៤។

ក្នុងជំនួបពិភាក្សាអំពីកិច្ចសហប្រតិបត្តិការ ដើម្បីដោះស្រាយតម្រូវការរបស់វិស័យឯកជននៅកម្ពុជា ជាមួយ លោក Paul Clements គណៈប្រតិភូមកពីសភាពាណិជ្ជកម្មអន្តរជាតិកម្ពុជា ឯកឧត្តម ហែម វណ្ណឌី បានបញ្ជាក់ថា ក្រសួងឧស្សាហកម្ម កំពុងជំរុញឱ្យម្ចាស់អាជីវកម្មក្រៅប្រព័ន្ធចូលក្នុងប្រព័ន្ធ ដើម្បីអាចចូលរួមក្នុងខ្សែច្រវាក់ផ្គត់ផ្គង់នៃឧស្សាហកម្មធំៗ។ ការចូលក្នុងប្រព័ន្ធរបស់ម្ចាស់អាជីវកម្ម នឹងទទួលបានគោលនយោបាយលើកទឹកចិត្តពីរដ្ឋាភិបាល ដូចជា ការលើកទឹកចិត្តផ្នែកពន្ធ អត្ថប្រយោជន៍របបសន្តិសុខសង្គម និងកម្មវិធីអភិវឌ្ឍន៍ជំនាញ ដែលអាចឈានចូលក្នុងប្រព័ន្ធ និងអាចក្លាយជាដៃគូរបស់ឧស្សាហកម្មធំៗ រួមទាំងសមាជិកនៃសភាពាណិជ្ជកម្មអន្តរជាតិកម្ពុជាផងដែរ។

ក្រសួងឧស្សាហកម្ម នឹងផ្តល់អ្នកជំនាញបច្ចេកទេសដល់សមាជិកសភាពាណិជ្ជកម្មអន្តរជាតិកម្ពុជា ដើម្បីចែករំលែកចំណេះដឹងទាក់ទងវិស័យផ្សេងៗ រួមមាន សុវត្ថិភាពឧស្សាហកម្ម សហគ្រាសធុនតូច និងមធ្យម ការផ្គត់ផ្គង់ទឹកស្អាត និងស្តង់ដាជាដើម។ ឯកឧត្តម ហែម វណ្ណឌី បានបញ្ជាក់ថា ចក្ខុវិស័យកម្ពុជា ឆ្នាំ២០៣០ និង២០៥០ គឺសង្កត់ធ្ងន់លើភាពចាំបាច់នៃការជំរុញការផលិត និងខ្សែច្រវាក់ផ្គត់ផ្គង់ក្នុងស្រុក ដើម្បីកាត់បន្ថយការពឹងផ្អែកលើការនាំចូលវត្ថុធាតុដើម៕