ភ្នំពេញ៖ ក្រសួងពាណិជ្ជកម្ម លើកទឹកចិត្តឱ្យពាណិជ្ជករ អ្នកនាំចូល អ្នកលក់ដុំ អ្នកលក់រាយ អ្នកជំនាញរចនាម៉ូត និងសាធារណជន ចូលរួមពិព័រណ៍ចំនួន២ រួមមាន៖ ពិព័រណ៍ IHGF ដេល្លីលើកទី៥៨ ឆ្នាំ២០២៤ និងពិព័រណ៍ The 13th Edition of India Chem 2024 នៅប្រទេសឥណ្ឌា ដើម្បីមានឱកាសអាចសហការជាមួយវិនិយោគិនឥណ្ឌា និងក្រុមហ៊ុនបរទេសនៅក្នុងប្រទេសឥណ្ឌាថែមទៀត។

តាមសេចក្តីជូនដំណឹងរបស់ក្រសួងពាណិជ្ជកម្ម នាថ្ងៃទី១៤ សីហា ពិព័រណ៍ IHGF ដេល្លីលើកទី៥៨ ឆ្នាំ២០២៤ នឹងប្រព្រឹត្តទៅនៅថ្ងៃទី១៦ ដល់២០ ខែតុលា ឆ្នាំ២០២៤ នៅមជ្ឈមណ្ឌលតាំងពិព័រណ៍ឥណ្ឌា ហ្គី្រតធ័រណយដា តំបន់ដេលី ប្រទេសឥណ្ឌា។ ចំពោះ ពិព័រណ៍ The 13th Edition of India Chem 2024 នឹងចាប់ផ្តើមពីថ្ងៃទី១៧ ដល់១៩ ខែតុលា នៅមជ្ឈមណ្ឌលតាំងពិព័រណ៍បុមបៃ ទីក្រុងបុមបៃ ប្រទេសឥណ្ឌា។

ពិព័រណ៍ IHGF ដេល្លីលើកទី៥៨ ឆ្នាំ២០២៤ នឹងមានការតាំងបង្ហាញនូវផលិតផល ១៤ប្រភេទផ្សេងៗគ្នា ដែលបានរៀបចំយ៉ាងល្អិតល្អន់នៃផលិតផលគ្រឿងសង្ហារិមជាង ២ពាន់មុខទំនិញ និង៣០០ម៉ូត ពិសេសជាងនេះនឹងមានការតាំងបង្ហាញគ្រឿងបរិក្ខារសង្ហារិមផ្សេងៗទៀត ដែលផលិតចេញពីប្លាស្ទិក កាកអំពៅ និងឫស្សី។ រីឯ ពិព័រណ៍ The 13th Edition of India Chem 2024 ជាព្រឹត្តិការណ៍សន្និសីទអន្តរជាតិ និងជាការតាំងពិព័រណ៍ ដើម្បីផ្ដល់ឱកាសដល់អ្នកចូលរួមអាចសហការជាមួយក្រុមហ៊ុនក្នុងប្រទេសឥណ្ឌាលើវិស័យឧស្សាហកម្មផ្សេងៗដូចជា៖ គីមី គីមីឥន្ធនៈ ថ្នាំពណ៌និងសារធាតុពណ៌ គីមីកសិកម្ម និងគ្រឿងម៉ាស៊ីន។

ពាណិជ្ជករ អ្នកនាំចូល អ្នកលក់ដុំ អ្នកលក់រាយ អ្នកជំនាញរចនាម៉ូត និងសាធារណជន ដែលមានបំណងចូលរួមអាចចុះឈ្មោះតាមរយៈគេហទំព័រ www.ihgfdelhifair,in, អ៊ីម៉ែល៖ rajesh. singh@epch.com និង https://registrations.ficci.com/fichem/online-registration.asp ឬទំនាក់ទំនងតាមរយៈលេខទូរសព្ទ៖ ០២៣ ២១០ ៩១២, +៩១៩៨៩១០៩៨៧៧២ អ៊ីម៉ែល៖ manoj.mehta@fcci.com យ៉ាងយូរបំផុតត្រឹមថ្ងៃទី៣១ ខែសីហា ឆ្នាំ២០២៤៕