ភ្នំពេញ៖ ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា (CDC) បានជជែកពិភាក្សាផ្លាស់ប្ដូរយោបល់អំពីការជំរុញការវិនិយោគជាមួយឯកឧត្តម តាកាហាស៊ី ហ្វូមីអាគី ប្រធានសមាគមជប៉ុន-កម្ពុជា។

ក្នុងជំនួបនាថ្ងៃទី១៣ ខែកញ្ញា ឆ្នាំ២០២៣នេះ ឯកឧត្តមឧបនាយករដ្ឋមន្ត្រី ស៊ុន ចាន់ថុល ក៏បានលើកឡើងអំពីការផ្សព្វផ្សាយសកម្មភាពទាក់ទាញវិនិយោគិន, ការស្វែងរកឱកាសថ្មីៗជំរុញការវិនិយោគពីបណ្ដាក្រុមហ៊ុនធំៗ ព្រមទាំងសហគ្រាសធុនតូច និងមធ្យម (SME) នៅប្រទេសជប៉ុនចូលមកវិនិយោគនៅកម្ពុជាផងដែរ។

ចំពោះ ឯកឧត្តម តាកាហាស៊ី ហ្វូមីអាគី ប្រធានសមាគមជប៉ុន-កម្ពុជា ដែលបានជួបពិភាក្សាជាមួយនឹងថ្នាក់ដឹកនាំកំពូលៗរបស់រាជរដ្ឋាភិបាលកម្ពុជាជាបន្ទបន្ទប់ និងបានជជែកពិភាក្សាផ្លាស់ប្ដូរយោបល់អំពីការជំរុញការវិនិយោគជា ជាមួយនឹងឯកឧត្តម ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា (CDC)ផងនោះ ឯកឧត្តម តាកាហាស៊ី ហ្វូមីអាគី បានបង្ហាញចំណាប់អារម្មណ៍ក្នុងការស្វែងរកការបណ្ដាក់ទុនវិនិយោគថ្មីៗពីជប៉ុនមកកម្ពុជាបន្ថែមទៀត៕