ភ្នំពេញ៖ «នំអាកោត្នោតភូមិព្រះដាក់» គឺជាអត្តសញ្ញាណជនបទដ៏ទាក់ទាញមួយរបស់អ្នកបន្ទាយស្រី ដែលអ្នកទេសចរជាតិ និងអន្តរជាតិមិនគួររំលង ដោយសារតែនំអាកោត្នោតនេះ ត្រូវបានគេធ្វើឡើងក្តៅៗថ្មីៗ ទន់ល្មើយ ផ្អែមល្មម មានអនាម័យ មានសុវត្ថិភាព និងប្រើប្រាស់វត្ថុធាតុដើមក្នុងស្រុក ១០០%។

បើតាមការចុះផ្សាយរបស់ឯកឧត្តម ឃឹម ហ្វីណង់ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ នាថ្ងៃទី១៨ ខែឧសភា ឆ្នាំ២០២៤ វត្ថុធាតុដើមដែលយកធ្វើជា «នំអាកោត្នោតភូមិព្រះដាក់» គឺដាំដោយប្រជាជនខ្មែរ និងផលិតដោយប្រជាជនខ្មែរផ្ទាល់ និងបានរួមចំណែកជួយលើកស្ទួយជីវភាពរបស់ប្រជាជនក្នុងសហគមន៍ផងដែរ។ ឯកឧត្តម ឃឹម ហ្វីណង់ លើកឡើងដូច្នេះថា៖«ខ្ញុំសប្បាយចិត្តដែលអ្នកភូមិ ចេះប្រើប្រាស់វត្ថុធាតុដើមផ្លែត្នោតដែលមានស្រាប់ក្នុងស្រុក រក្សាបានទាំងអនាម័យ និងការវេចខ្ចប់បែបជនបទមិនប៉ះពាល់ដល់បរិស្ថាន»។

«អាកោត្នោត» កំពុងតែក្លាយជាអត្តសញ្ញាណថ្មីរបស់ស្រុកបន្ទាយស្រី ដែលបានរីកដុះដាលយ៉ាងខ្លាំងនៅក្នុងភូមិព្រះដាក់ ដោយបានបង្កើតជាមុខរបរ និងប្រាក់ចំណូលបន្ថែមផ្គត់ផ្គង់ដល់ជីវភាពរបស់ប្រជាសហគមន៍ផងដែរ។ សាធារណជន អាចជាវ«នំអាកោត្នោតភូមិព្រះដាក់»ពីម៉ោង ៩ព្រឹក ដល់ម៉ោង ៤ល្ងាច ឬទំនាក់ទំនងមកកាន់លេខទូរសព្ទ ០៧៨ ២៤៨ ០៤១ ឬ០៧៧ ៤៧២ ៨៤១៕