ភ្នំពេញ៖ រយៈពេល ៤ខែ ក្នុងឆ្នាំ២០២៤ កម្ពុជា រកចំណូលបានជិត២០លានដុល្លារ (១៩ ៩១៧ ៥៣៣ ដុល្លារ) ពីការលក់សំបុត្រជូនភ្ញៀវបរទេសចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្នៀស ដែលក្នុងនោះ មានភ្ញៀវទេសចរចូលទស្សនាសរុប ៤២១ ៣៧៩ នាក់ មានការកើនឡើង ៤០,៩៣% បើគិតរយៈពេលដូចគ្នាក្នុងឆ្នាំ២០២៣។ នេះបើតាមសេចក្តីប្រកាសព័ត៌មានរបស់គ្រឹះស្ថានអង្គរ នាថ្ងៃទី១ ឧសភា។

បើតាមសេចក្តីប្រកាសខាងលើ បានបញ្ជាក់ថា ចំណូលពីការលក់សំបុត្រជូនភ្ញៀវបរទេសចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្នៀសចំនួន ១៩ ៩១៧ ៥៣៣ ដុល្លារ មានការកើនឡើង ៤១,៩៥% បើធៀបនឹងរយៈពេលដូចគ្នាក្នុងឆ្នាំ២០២៣។ ចំពោះ ចំណូលពីការលក់បណ្ណនៅប្រាសាទកោះកែរ ក្នុងរយៈពេល ៤ខែ មាន ១៣៧ ៥០៥ ដុល្លារ ដែលមានភ្ញៀវអន្តរជាតិចំនួន ៩ ១៦៧នាក់។

រីឯ ចំណូលលក់សំបុត្រទូក ក្នុងរយៈពេល៤ខែវិញ មានចំនួន ៣៦១ ៥៥៦ដុល្លារ ក្នុងនោះ មានទូកតូចចំនួន ៧ ៩៥០, ទូកកណ្តាលមានចំនួន ៣ ៧១៣ និងទូកធំចំនួន ៥៤៥ និងចំណូលឧបត្ថម្ភមូលនិធិគន្ធបុប្ផាកម្ពុជា មានចំនួន ៨៤២ ៤៥៨ដុល្លារ។ គួរបញ្ជាក់ថា ក្នុងខែមេសា ឆ្នាំ២០២៤ កម្ពុជា រកចំណូលពីការលក់សំបុត្រជូនភ្ញៀវបរទេសចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្នៀសបានចំនួន ៣ ៣៨៤ ២៤០ដុល្លារ៕