ភ្នំពេញ៖ កម្ពុជា-ហ្វីលីពីន បានពិនិត្យពិភាក្សាលើកិច្ចប្រជុំចរចាលើកិច្ចព្រមព្រៀង ស្ដីពី៖ការចៀសវាងការយកពន្ធត្រួតគ្នា (Double Taxation Agreement-DTA)» ជុំទី៣ ដើម្បីជំរុញ និងពង្រីកកិច្ចសហប្រតិបត្តិការទ្វេភាគី សម្រាប់ផលប្រយោជន៍ទៅវិញទៅមករវាងកម្ពុជា និងហ្វីលីពីន កាលពីថ្ងៃទី១៧-១៩ ខែមេសា ឆ្នាំ២០២៤។

ក្នុងកិច្ចប្រជុំនេះ ឯកឧត្តម Gerald Alan A. Quebal អនុរដ្ឋមន្ត្រីនៃក្រសួងហិរញ្ញវត្ថុហ្វីលីពីន បានលើកឡើងអំពីរបាយការណ៍សង្ខេបនូវលទ្ធផលនៃការចរចាជុំទី១ និងជុំទី២ ដោយផ្ដោតលើ ចំណុចដែលបានឯកភាព ហើយភាគីទាំងពីរបានចាប់ដំណើរការកិច្ចចរចាដែលបានគ្រោងទុក។ លើសពីនេះ ឯកឧត្តម Gerald Alan A. Quebal ក៏បានបញ្ជាក់អំពីសារៈសំខាន់នៃកិច្ចព្រមព្រៀង DTA ក្នុងការជួយជំរុញនិង ពង្រីកកិច្ចសហប្រតិបត្តិការទ្វេភាគី សម្រាប់ផលប្រយោជន៍ទៅវិញទៅមករវាងកម្ពុជា និងហ្វីលីពីន។

ក្នុងជំនួបនេះ ភាគីទាំងពីរ បានពិភាក្សាយ៉ាងលម្អិតលើគ្រប់ចំណុចដែលពុំទាន់ឯកភាពក្នុងជុំទី១ និងទី២ កន្លងមក និងបានពិនិត្យនិងពិភាក្សាបន្ថែមលើចំណុចដែលភាគីហ្វីលីពីន ស្នើសុំធ្វើបច្ចុប្បន្នភាពតាមគំរូកិច្ចព្រមព្រៀង DTA របស់ខ្លួន ជាលទ្ធផល មាត្រាទាំងអស់នៃកិច្ចព្រមព្រៀង DTA ត្រូវបានឯកភាពគ្នាទាំងស្រុង។

លោកបណ្ឌិត សេង ជាសិទ្ធ ប្រធាននាយកដ្ឋាននីតិកម្ម គោលនយោបាយសារពើពន្ធ និងសហប្រតិបត្តិការពន្ធដារអន្តរជាតិ បានលើកឡើងថា កិច្ចខិតខំរបស់ភាគីហ្វីលីពីនក្នុងការរៀបចំឱ្យមានកិច្ចប្រជុំចរចា កិច្ចព្រមព្រៀង DTA ជុំទី៣ ជាលក្ខណៈរូបវន្តនាពេលនេះ គឺជាការផ្តល់ជូនគណៈប្រតិភូកម្ពុជានូវបដិសណ្ឋារកិច្ចយ៉ាងកក់ក្តៅ៕