ភ្នំពេញ៖ ប្រមុខរដ្ឋាភិបាល សម្តេចធិបតី ហ៊ុន ម៉ាណែត បានថ្លែងអំណរគុណដល់ក្រសួង-ស្ថាប័ន អាជ្ញាធរមានសមត្ថកិច្ច និងភាគីពាក់ព័ន្ធទាំងអស់ ដែលបានចូលរួមសហការបំពេញភារកិច្ចរៀបចំ តុបតែង និងប្រចាំការការពារសន្តិសុខសណ្តាប់ធ្នាប់ ក្នុងអំឡុងពេលចូលឆ្នាំថ្មី ប្រពៃណីជាតិ ឆ្នាំ២០២៤នេះ។

សាររបស់សម្តេចធិបតី បានបង្ហោះនៅលើបណ្តាញសង្គម នាព្រឹកថ្ងៃទី១៧ ខែមេសា ឆ្នាំ២០២៤ ក្រោយពិធីបុណ្យចូលឆ្នាំថ្មី ប្រពៃណីជាតិ បានគូសបញ្ជាក់ថា ការចូលរួមសហការបំពេញភារកិច្ចរៀបចំ តុបតែង និងប្រចាំការការពារសន្តិសុខសណ្តាប់ធ្នាប់ ដែលធានាបាននូវសុវត្ថិភាព បានបង្កលក្ខណៈដល់ការកម្សាន្តសប្បាយរបស់បងប្អូន អ៊ំពូមីង តាយាយ ព្រមទាំងបានញុាំងឱ្យការប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស ២៥៦៨ នៅទូទាំងប្រទេស បានប្រព្រឹត្តទៅដោយភាពសប្បាយរីករាយ សោភណភាព សេចក្តីថ្លៃថ្នូរ សុខសុវត្ថិភាព របៀបរៀបរយល្អ ប្រកបដោយមោទកភាពជាតិ។

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានថ្លែងអំណរគុណដល់ប្រជាពលរដ្ឋ និងភ្ញៀវបរទេសទាំងអស់ ដែលបានចូលរួមលេងកំសាន្តប្រកបដោយភាពរីករាយ ព្រមទាំងថែរក្សាបាននូវប្រពៃណីវប្បធម៌ដ៏ផូរផង់របស់ខ្មែរ។ «កត្តាចម្បងបំផុត គឺម្លប់នៃសុខសន្តិភាព ដែលបានផ្តល់នូវឱកាសឱ្យប្រជាជនខ្មែរគ្រប់រូប អាចរួមរស់ប្រកបដោយកុសលធម៌ និងសាមគ្គីធម៌ ក្នុងធ្លុងជាមហាគ្រួសារខ្មែរតែមួយ នៅលើទឹកដីមាតុភូមិអង្គរដ៏បវរជាទីស្នេហា និងក្នុងសេចក្តីសុខក្សេមក្សាន្ត កិត្តិយស និងសេចក្តីថ្លៃថ្នូរ ជាដរាបតរៀងទៅ»។ សម្តេចធិបតីបានគូសបញ្ជាក់យ៉ាងដូច្នេះអំពីតម្លៃនៃសន្តិភាព ដែលនាំឱ្យប្រជាពលរដ្ឋបានលេងកម្សាន្តសប្បាយគ្រប់ទីកន្លែង។

សម្តេចនាយករដ្ឋមន្ត្រី ក៏បានអំពាវនាវដល់ប្រជាលរដ្ឋធ្វើដំណើរមកបំពេញការងារក្រោយពីពិធីបុណ្យចូលឆ្នាំថ្មីប្រពៃណីជាតិ ដោយមានភាពប្រុងប្រយ័ត្ន និងសុខសុវត្ថិភាពផងដែរ៕