ភ្នំពេញ៖ ក្រុមហ៊ុន CGN Energy International Holdings Co., Limited. (CGNEI) មានគោលបំណងស្វែងយល់អំពីកាលានុវត្តភាពវិនិយោគលើគម្រោងថាមពលកកើតឡើងវិញ ក្នុងទម្រង់សាងសង់-ប្រតិបត្តិការ-ផ្ទេរ (BOT) នៅកម្ពុជា។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី២៥ ខែកញ្ញា ឆ្នាំ២០២៤។

ក្នុងជំនួបជាមួយលោក Liu Run អ្នកចាត់ការទូទៅនៃនាយកដ្ឋានសហប្រតិបត្តិការអាជីវកម្មក្រុមហ៊ុន CGNEI ឯកឧត្តម បណ្ឌិត សរ សិនិរ៉ា អគ្គលេខាធិការរងគណៈគម្មាធិការវិនិយោគកម្ពុជា បានលើកឡើងពីរបបលើកទឹកចិត្តវិនិយោគ និងគោលនយោបាយពាក់ព័ន្ធនានា ដោយក្នុងនោះវិស័យថាមពលស្អាតក៏ជាគម្រោងវិនិយោគស្ថិតក្នុងវិស័យអាទិភាពក្រោមច្បាប់ស្តីពីវិនិយោគនៃកម្ពុជាផងដែរ។

ឯកឧត្តម បណ្ឌិត សរ សិនិរ៉ា បន្តបង្ហាញពីការផ្តល់កិច្ចសម្រួលការវិនិយោគ ជាពិសេសនិន្នាការក្នុងបរិបទដែលតំបន់និងអន្តរជាតិ កំពុងតែបោះជំហានក្នុងការធ្វើបរិវត្តកម្មថាមពលទៅជាថាមពលបៃតង។ ទាក់ទងនឹងការវិនិយោគនេះ ឯកឧត្តម បណ្ឌិត សរ សិនិរ៉ា ជំរុញឱ្យវិនិយោគិនធ្វើការជាមួយក្រសួង ស្ថាប័នពាក់ព័ន្ធ ដើម្បីបន្ស៊ីគម្រោងវិនិយោគខាងលើឱ្យមានសង្គតិភាពជាមួយផែនការមេសម្រាប់អភិវឌ្ឍន៍វិស័យថាមពលអគ្គិសនី ២០២២-២០៤០។

គួរបញ្ជាក់ផងដែរថា បច្ចុប្បន្ន ក្រុមហ៊ុន CGNEI មានគម្រោងថាមពលអគ្គិសនីបៃតងចំនួន៤៩ គម្រោង នៅក្នុងប្រទេសចំនួន១៦ នៅលើពិភពលោក ដែលរួមមានប្រទេសម៉ាឡេស៊ី ប្រទេសកូរ៉េខាងត្បូង និងប្រទេសអារ៉ាប់រួមជាដើម៕