ភ្នំពេញ៖ គ្រាប់ស្វាយចន្ទីកែច្នៃរួច នឹងមានដាក់លក់ក្នុងផ្សារតាមអាកាសយានដ្ឋាន ក្រុមហ៊ុនអាកាសចរណ៍ជាតិ និងអន្តរជាតិ។ ការជំរុញផលិតផលស្វាយចន្ទីកម្ពុជា ទៅក្នុងវិស័យអាកាសចរណ៍ ធ្វើឡើងក្នុងគ្រា លោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម ដឹកនាំកិច្ចប្រជុំស្តីពី «ការដាក់លក់គ្រាប់ស្វាយចន្ទីកែច្នៃរួចនៅតាមអាកាសយានដ្ឋាន និងក្រុមហ៊ុនអាកាសចរណ៍ស៊ីវិល»។

ភាគីចូលរួមក្នុងកិច្ចប្រជុំ ដែលមានឯកឧត្តម វ៉ាន់ ចន្ទី អគ្គនាយកគោលនយោបាយដឹកជញ្ជូនតាមផ្លូវអាកាសនៃរដ្ឋលេខាធិការដ្ឋានអាកាសចរណ៍ស៊ីវិល អាកាសយានដ្ឋានអន្តរជាតិ ក្រុមហ៊ុនអាកាសចរណ៍ជាតិនិងអន្តរជាតិ ក្រុមហ៊ុនផ្តល់សេវាកម្មផ្គត់ផ្គង់អាហារ (Cambodia Air Catering Service) និងក្រុមហ៊ុនកែច្នៃស្វាយចន្ទីកម្ពុជា បានឯកភាពជំរុញផលិតផលស្វាយចន្ទីកម្ពុជា ទៅក្នុងវិស័យអាកាសចរណ៍។

ក្រៅពីឯកភាពជំរុញផលិតផលស្វាយចន្ទីកម្ពុជា ទៅក្នុងវិស័យអាកាសចរណ៍ ក្នុងកិច្ចប្រជុំកាលពីថ្ងៃទី២៣ ខែសីហា ឆ្នាំ២០២៤ ភាគីពាក់ព័ន្ធ នឹងផ្តល់កិច្ចសហការយ៉ាងពេញទំហឹងលើយន្តការជំរុញការអនុវត្តគោលនយោបាយជាតិស្តីពីស្វាយចន្ទីផងដែរ។ នេះបើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី២៦ ខែសីហា ឆ្នាំ២០២៤៕