ភ្នំពេញ៖ កម្ពុជា រកចំណូលពីការលក់សំបុត្រជូនភ្ញៀវអន្តរជាតិចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្នៀសបាន ១៦ ៥៣៣ ២៩៣ដុល្លារ ក្នុងរយៈពេល៣ខែដំបូង ឆ្នាំ២០២៤។ បើតាមសេចក្តីប្រកាសព័ត៌មានរបស់គ្រឹះស្ថានអង្គរ នាថ្ងៃទី១ មេសា ចំនួននេះ កើនឡើង ៤៨,៤៧% ធៀបនឹងរយៈពេលដូចគ្នា ឆ្នាំ២០២៣។

សេចក្តីប្រកាសព័ត៌មាន ស្តីពីស្ថិតិភ្ញៀវបរទេស និងចំណូលដែលទទួលបានពីការលក់បណ្ណចូលទស្សនារមណីយដ្ឋានអង្គរ ប្រសាទកោះកែរ និងកំពង់ផែចុងឃ្មៀស ប្រចាំខែមីនា ឆ្នាំ២០២៤ បញ្ជាក់ថា រយៈពេល ៣ខែនេះ រមណីយដ្ឋានអង្គរ ទទួលបានភ្ញៀវអន្តរជាតិសរុប ៣៤៧ ៥៣៤នាក់ កើនឡើង ៤៧,០៥% ធៀបនឹងរយៈពេលដូចគ្នា ឆ្នាំ២០២៣។ ចំណែក ការលក់បណ្ណឱ្យភ្ញៀវទេសចរអន្តរជាតិចូលទស្សនាប្រាសាទកោះកែរ មានចំនួន ៨ ០៧៧នាក់ ស្មើនឹង ១២១ ១៥៥ដុល្លារ។

ការលក់សំបុត្រទូកវិញ គ្រឹះស្ថានអង្គរទទួលបានចំណូល ៣០៤ ២១១ដុល្លារ ដែលទូកសរុបមានចំនួន៩ ៩៥៣ ក្នុងនោះទូកតូចចំនួន ៦ ៣២១, ទូកកណ្តាលចំនួន៣ ១៥៤ និងទូកធំចំនួន៤៧៨។ គួរបញ្ជាក់ថា ក្នុងខែមីនា ឆ្នាំ២០២៤ មានភ្ញៀវបរទេសចូលទស្សនារមណីដ្ឋានអង្គរចំនួន ១១១ ៦៨៤នាក់ កើនឡើង៤០,៦៨% ធៀបនឹងខែមីនា ឆ្នាំ២០២៣ និងរកចំណូលបាន ៥ ២៩៨ ៦១៨ដុល្លារ កើនឡើង ៤១,៣៥% ធៀបនឹងខែមីនា ឆ្នាំ២០២៣៕