ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ នឹងរៀបចំវេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ នាំយកឱកាសការងារ ៨៧ ៣៦១កន្លែង សម្រាប់អ្នកខេត្តបាត់ដំបង និងប៉ៃលិន នៅថ្ងៃទី៧-៨ ខែកុម្ភៈ ឆ្នាំ២០២៦ ដើម្បីឱ្យអតីតពលករដែលវិលត្រឡប់មកកម្ពុជា យុវជន និងអ្នកស្វែងរកការងារ អាចដាក់ពាក្យ និងសម្ភាសការងារភ្លាមៗផ្ទាល់នៅទីតាំង។

ចំពោះ អតីតពលករដែលវិលត្រឡប់មកកម្ពុជា យុវជន និងអ្នកស្វែងរកការងារ អាចដាក់ពាក្យបាន នៅ ៤ ទីតាំងចាប់ពីម៉ោង ៨ព្រឹក ដល់ម៉ោង ៣រសៀល ក្នុងនោះរួមមាន៖ ថ្ងៃទី០៧ ខែកុម្ភៈ ឆ្នាំ២០២៦ មាននៅខេត្តប៉ៃលិន ស្រុកសាលាក្រៅ នៅក្នុងបរិវេណសាលាស្រុក សាលាក្រៅ​ និងខេត្តបាត់ដំបង ស្រុកសំឡូត នៅបរិវេណសាលាស្រុកសំឡូត។

រីឯ ថ្ងៃទី០៨ ខែកុម្ភៈ ឆ្នាំ២០២៦ មានទីតាំងនៅខេត្តប៉ៃលិន ក្រុងប៉ៃលិន នៅក្នុងបរិវេណវិទ្យាល័យ ក្រុងទេពនិមិត្ត និងខេត្តបាត់ដំបង ស្រុករតនមណ្ឌល នៅក្នុងបរិវេណសាលាបឋមសិក្សា អ៊ីនស៊ីដារ៉េ។ ជាមួយគ្នានេះ ពលករដែលមានបំណងស្វែងរកការងារ នឹងទទួលបាន «ការដឹកជញ្ជូនចូលរួមកម្មវិធី អាហារ និងភេសជ្ជៈ» ដោយឥតគិតថ្លៃ៕