ភ្នំពេញ៖ គម្រោងពិពិធកម្មកសិកម្មកម្ពុជា (CASDP) ដែលដឹកនាំអនុវត្តដោយក្រសួងកសិកម្ម និងមានទុនវិនិយោគប្រមាណ១០០លានដុល្លារ ក្រោមហិរញ្ញប្បទានពីធនាគារពិភពលោក សម្រេចលទ្ធផលបាន៨៦% នៃសូចនាករគោលដៅរបស់ខ្លួន ក្នុងរយៈពេល ៦ឆ្នាំចុងក្រោយនេះ។

ឯកឧត្តម ឃឹម ហ្វីណង់ អ្នក​ពាក្យ​ក្រសួង​កសិកម្ម បានឱ្យដឹងថា សមិទ្ធផលសំខាន់ៗដែលសម្រេចបានរួមមាន៖ ផែនការអាជីវកម្ម បានអនុម័តជាង ១០០ដល់សហគមន៍កសិកម្ម, ហេដ្ឋារចនាសម្ព័ន្ធ បានសាងសង់ផ្លូវបាន ១៧០ គីឡូម៉ែត្រ, ប្រព័ន្ធស្រោចស្រព គ្របដណ្តប់លើផ្ទៃដីជាង ៨,០០០ ហិកតា និងមានអ្នកទទួលផលដោយផ្ទាល់កសិករជិត ២០ ០០០គ្រួសារ។

ឯកឧត្តម ឃឹម ហ្វីណង់ បានបន្ថែមថា នៅមានគម្រោងជាច្រើនទៀតដែលកំពុងដឹកនាំនិងចូលរួមអនុវត្តដោយក្រសួងកសិកម្ម ដែលកំពុងជះឥទ្ធិពលជាវិជ្ជមាន ដល់ការលើកកម្ពស់ជីវភាពបងប្អូនប្រជាកសិករនៅតាមមូលដ្ឋានឱ្យកាន់តែប្រសើរឡើង៕