ភ្នំពេញ៖ កម្ពុជា គឺជាគោលដៅទេសចរណ៍សុវត្ថិភាព និងមានទាក់ទាញ សម្រាប់ទេសចរណ៍កីឡា និងវប្បធម៌ ពោលគឺការរួមបញ្ចូលរវាងកីឡា ទេសចរណ៍ និងវប្បធម៌ ក្នុងពិធីប្រគល់រង្វាន់ជ័យលាភីទិវារត់ប្រណាំងឆ្លងកាត់ឧបសគ្គចម្ងាយឆ្ងាយលើកទី៩ ដល់អត្តពលិក បានធ្វើឱ្យកម្ពុជាក្លាយជាគោលដៅដ៏គួរឱ្យចាប់អារម្មណ៍ដល់ភ្ញៀវទេសចរជាតិ និងអន្តរជាតិ ដែលចង់ទទួលបទពិសោធទេសចរណ៍ថ្មី ប្លែក និងបរិយាកាសសុវត្ថិភាព ប្រកបដោយអត្ថន័យ និងភាពចម្រុះ។

ព្រឹត្តិការណ៍រត់ប្រណាំងចម្ងាយឆ្ងាយឆ្លងកាត់ឧបសគ្គ Angkor Ultra Trail 2026 បានទាក់ទាញអ្នកចូលរួមប្រមាណ ១ ៧៤០នាក់ អញ្ជើញមកពី៥២ប្រទេសផ្សេងគ្នា និងជាព្រឹត្តិការណ៍ដ៏អស្ចារ្យដើម្បីស្វាគមន៍ភ្ញៀវទេសចរជាតិ និងអន្តរជាតិមកកាន់ព្រះរាជាណាចក្រកម្ពុជានិយាយជារួម និងមកកាន់តំបន់អង្គរដ៏បវរនៃយើងទាំងអស់គ្នា។  

គួរបញ្ជាក់ថា ពិធីប្រគល់រង្វាន់ជ័យលាភីទិវារត់ប្រណាំងឆ្លងកាត់ឧបសគ្គចម្ងាយឆ្ងាយលើកទី៩ ដល់អត្តពលិក មានវិញ្ញាសារត់ប្រណាំងចំនួន ៨ រួមមាន៖ ១០០ គីឡូម៉ែត្រ ,៦៤គីឡូម៉ែត្រ ,៤២គីឡូម៉ែត្រ ,៣២គីឡូម៉ែត្រ ,១៨គីឡូម៉ែត្រមាន ៣ ប្រភេទ និង ៨គីឡូម៉ែត្រ ក្រោមអធិបតីភាពឯកឧត្តមបណ្ឌិត ថោង ខុន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានគណៈកម្មាធិការជាតិអូឡាំពិក (NOCC)៕