ភ្នំពេញ៖ រ៉ូបូត មានឈ្មោះថា វិជ្ជា ដែលដំណើរការដោយបច្ចេកវិទ្យា AI របស់វិទ្យាស្ថានពហុបច្ចេកទេសព្រះកុសុមៈ អាចប្រើប្រាស់បានភាសាចំនួន៨ ក្នុងការសន្ទនាជាមួយមនុស្ស ដោយភាសាចំនួន ៨ នោះ រួមមាន៖ ភាសាខ្មែរ អង់គ្លេស ជប៉ុន ចិន ថៃ វៀតណាម កូរ៉េ និងភាសាបារាំង។

លោក សេង សុខហៀង ដែលជានិស្សិតឆ្នាំទី៤ នៃវិទ្យាស្ថានពហុបច្ចេកទេសព្រះកុសុមៈ បានលើកឡើងថា វិជ្ជា គឺមានសមត្ថភាពសំខាន់ម្យា៉ងទៀត អាចផ្លាស់ទីដោយស្វ័យប្រវត្តិ និងអាចប្រើប្រាស់កាយវិការ ដូចទៅនឹងការសន្ទនាជាមួយមនុស្សផ្ទាល់តែម្តង។

និសិ្សតឆ្នាំទី៤ ដែលមានអាយុ ២៤ឆ្នាំរូបនេះ បានបន្តថា ការចូលរួមក្នុងវេទិការដ្ឋាភិបាលឌីជីថល ឆ្នាំ២០២៥ និងពិព័រណ៍ច្ចេកវិទ្យាឌីជីថលកម្ពុជា-អន្តរជាតិនៅថ្ងៃនេះ វិជ្ជា គឺទទួលបានការចាប់អារម្មណ៍យ៉ាងច្រើនពីសាធារណជន ដែលមានមកចូលរួម ក្នុងនោះភាគច្រើន ជាសិស្ស-និស្សិតដែលស្រឡាញ់ខាងបច្ចេកវិទ្យា។