ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ មានផែនការបញ្ចូលសេវាសាធារណៈចំនួន៤១ សេវាក្នុងប្រព័ន្ធគំរូស្តង់ដានៃសេវាអេឡិចត្រូនិកសម្រាប់ធុរកិច្ច ក្នុងនោះសេវាស្នើសុំបង្កើតកសិដ្ឋានចិញ្ចឹមសត្វ ឬបង្កាត់ពូជសត្វខ្នាតមធ្យម និងធំ របស់អគ្គនាយកដ្ឋានសុខភាពសត្វ និងផលិតកម្មសត្វ បានអភិវឌ្ឍន៍ដោយជោគជ័យ នឹងគ្រោងដាក់ឱ្យដំណើរការជាផ្លូវការនាថ្ងៃទី២៤ ខែវិច្ឆិកា ឆ្នាំ២០២៥ខាងមុខ។ នេះបើតាមការលើកឡើងរបស់ ឯកឧត្តម សៀក ឡេង អនុរដ្ឋលេខាធិការក្រសួងកសិកម្ម។

ការបញ្ជាក់ខាងលើនេះ ធ្វើឡើងក្នុងឱកាស ឯកឧត្តម សៀក ឡេង ដឹកនាំកិច្ចប្រជុំពិភាក្សាជាមួយក្រុមការងារជំនាញមកពីមជ្ឈមណ្ឌលបណ្តុះធុរកិច្ចថ្មីតេជោនៃក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានសុខភាពសត្វ និងផលិតកម្មសត្វ អគ្គនាយកដ្ឋានកសិកម្ម និមជ្ឈមណ្ឌលព័ត៌មាន និងឯកសារកសិកម្ម ថ្ងៃទី២១ ខែវិច្ឆិកា ឆ្នាំ២០២៥ ដើម្បីពិនិត្យលើវឌ្ឍនភាពនៃការដាក់បញ្ចូលសេវាសាធារណៈរបស់អគ្គនាយកដ្ឋានសុខភាពសត្វ និងផលិតកម្មសត្វ និងអគ្គនាយកដ្ឋានកសិកម្មក្នុងប្រព័ន្ធអេឡិចត្រូនិក។ នេះបើតាមការចេញផ្សាយរបស់ ក្រសួងកសិកម្ម៕