ភ្នំពេញ៖ គម្រោងវិនិយោគចំនួន ២១ ដែលមានដើមទុនវិនិយោគសរុបជិត៦១៩លានដុល្លារ ត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តនៅក្នុងខែវិច្ឆិកា ឆ្នាំ២០២៣នេះ ដោយបង្កើតការងារបានជិត២២ម៉ឺនកន្លែង។ នេះបើតាមសេចក្តីប្រកាសព័ត៌មានរបស់ CDC នៅថ្ងៃទី០៨ ធ្នូនេះ។

CDC បានកត់សម្គាល់ថា គម្រោងវិនិយោគដែលមានភាពលេចធ្លោជាងគេប្រចាំខែវិច្ឆិកា មានគម្រោងសាងសង់វារីអគ្គិសនីស្ទឹងឬស្សីជ្រុំកណ្តាល មានអានុភាព ៧០មេហ្កាវ៉ាត់ និងគម្រោងសាងសង់វារីអគ្គិសនីវាលថ្មកំបុត មានអានុភាព ១០០មេហ្កាវ៉ាត់ ដែលស្ថិតនៅក្នុងស្រុកមណ្ឌលសីមា ខេត្តកោះកុង។ 

គម្រោងលេចធ្លោចំនួន២ផ្សេងទៀត គឺគម្រោងវិនិយោគអភិវឌ្ឍន៍ស្ថានីយផលិតអគ្គិសនីដើរដោយថាមពលព្រះអាទិត្យ ដែលមានអានុភាព ៦០មេហ្គាវ៉ាត់ ស្ថិតនៅស្រុករំដួល ខេត្តស្វាយរៀង។ គម្រោងចុងក្រោយ គឺគម្រោងបង្កើតរោងច្រកផលិតស្បែកជើង និងគ្រឿងបន្សំស្បែកជើង នៅខណ្ឌពោធិ៍សែនជ័យ រាជធានីភ្នំពេញ។ 

សេចក្តីប្រកាសព័ត៌មានរបស់ CDC បានឱ្យដឹងពីទំហំទុនវិនិយោគរបស់គម្រោងវិនិយោគទាំង២១ នោះផងដែរថា ទុនវិនិយោគក្នុងស្រុកគ្របដណ្តប់ដល់ទៅ ៨២,៩ភាគរយ នៃទុនវិនិយោគសរុប ខណៈដែលទុនវិនិយោគមកពីប្រទេសចិនមានប្រមាណ ១៧,១ភាគរយប៉ុណ្ណោះ។ បន្ថែមពីនេះ វិស័យឧហ្សាហកម្មមានរហូតដល់ទៅ៩០ភាគរយ ខណៈដែល១០ភាយទៀត គឺស្ថិតនៅក្នុងវិស័យហេដ្ឋារចនាសម្ព័ន្ធ និងវិស័យផ្សេងៗ ដែលគម្រោងទាំង២១ បានវិនិយោគនៅកម្ពុជា៕