ភ្នំពេញ៖ សម្តេចធិបតី ហ៊ុន ម៉ាណែត និងឯកឧត្តម លី សៀន ឡុង បានជួបពិភាក្សាការងារទ្វេភាគី ដើម្បីពង្រឹងនិងពង្រីកកិច្ចសហប្រតិបត្តិការលើវិស័យពាណិជ្ជកម្ម, សេដ្ឋកិច្ច និងទេសចរណ៍ នាថ្ងៃទី៥ ខែមីនា ឆ្នាំ២០២៤នេះ ក្នុងឱកាសចូលរួមកិច្ចប្រជុំកំពូលពិសេស អាស៊ាន-អូស្រ្តាលី នៅទីក្រុងម៉ែលប៊ន ប្រទេសអូស្ត្រាលី។ 

ក្នុងវិស័យពាណិជ្ជកម្ម និងសេដ្ឋកិច្ច សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា និងឯកឧត្តម លី សៀន ឡុង នាយករដ្ឋមន្ត្រីសិង្ហបុរី បានឯកភាពលើការជំរុញឱ្យមានទំនាក់ទំនងកាន់តែល្អប្រសើរ ដោយបានលើកទឹកចិត្តឱ្យមានការជំរុញកិច្ចសហប្រតិបត្តិការរវាងក្រសួង ស្ថាប័នពាក់ព័ន្ធនៃប្រទេសទាំងពីរ ដើម្បីធ្វើយ៉ាងណាឱ្យមានគំនិតផ្តួចផ្តើម និងផែនការសកម្មភាពជាក់លាក់។

ក្រៅពីវិស័យពាណិជ្ជកម្ម និងសេដ្ឋកិច្ច សម្ដេចធិបតី ហ៊ុន ម៉ាណែត បានលើកឡើងពីកិច្ចសហប្រតិបត្តិការលើវិស័យទេសចរណ៍ផងដែរ ដោយសម្តេចធិបតី គូសបញ្ជាក់ទៅឯកឧត្តមលី សៀន ឡុង ថា កម្ពុជាបានដាក់ចេញកម្មវិធីទស្សនាខេត្តសៀមរាបឆ្នាំ ២០២៤, ការដាក់ឱ្យដំណើរការអាកាសយានដ្ឋានអន្តរជាតិសៀមរាបអង្គរ និងការរៀបចំនូវយន្តការនៃការជំរុញវិស័យទេសចរណ៍នៅកម្ពុជា ដោយមានការចូលរួមពីវិស័យឯកជន។

សម្ដេចធិបតី បានប្រាប់ទៅ ឯកឧត្តមនាយករដ្ឋមន្រ្តីសិង្ហបុរី ផងដែរថា ប្រទេសទាំងពីរគួរបង្កើននូវកិច្ចសហប្រតិបត្តិការជាមួយគ្នាបន្ថែមទៀត តាមរយ:ការបង្កើតផលិតផលទេសចរណ៍ឱ្យកាន់តែមានភាពសម្បូរបែប និងទាក់ទាញ បង្កនូវភាពងាយស្រួល និងពង្រីកជើងហោះហើរត្រង់ រួមទាំងលើកកម្ពស់នូវទំនាក់ទំនងរវាងវិស័យឯកជន ដើម្បីស្វែងរកសក្តានុពលថ្មីៗនៃវិស័យទេសចរណ៍។

សូមជម្រាបផងដែរថា ក្រៅពីបានជួបពិភាក្សាលើការងារពង្រឹងនិងពង្រីកកិច្ចសហប្រតិបត្តិការលើវិស័យពាណិជ្ជកម្ម សេដ្ឋកិច្ច និងទេសចរណ៍ ថ្នាក់ដឹកនាំនៃប្រទេសទាំងពីរ ក៏បានលើកយកវិស័យនយោបាយ ការពារជាតិ និងសន្ដិសុខ និងសន្ដិសុខថាមពល មកពិភាក្សាផងដែរ៕