ភ្នំពេញ៖ ក្រសួងសាធារណការ និងដឹកជញ្ជូន រកចំណូលបានប្រមាណ១៦លានដុល្លារ ពីការលក់ផ្លាកលេខពិសេស និងពិសេសផ្ទាល់ខ្លួនសម្រាប់រថយន្តចំនួន ២៦ ៦៥៩ គ្រឿង ក្នុងឆ្នាំ២០២៣។ នេះបើតាមប្រសាសន៍របស់ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន ក្នុងពិធីបើកសន្និបាតបូកសរុបការងារប្រចាំឆ្នាំ២០២៣ កាលពីថ្ងៃទី២៨ ខែកុម្ភៈ ឆ្នាំ២០២៤។

ឯកឧត្តមរដ្ឋមន្ត្រី បានបញ្ជាក់ថា ក្នុងចំណោមចំណូល ១៦លានដុល្លារនេះ គឺមានជាង ៣៦ ៧១៥លានរៀល (ប្រមាណ៩លានដុល្លារ) បានមកពីការចុះបញ្ជីផ្លាកលេខពិសេសផ្ទាល់ខ្លួនចំនួន ៥ ២៩៨ផ្លាក។ ចំណែក ចំណូលជាង ២៩ ៧៣៦លានរៀល (ប្រមាណ៧លានដុល្លារ) គឺបានពីការចុះបញ្ជីផ្លាកលេខពិសេស(រាជធានី-លេខ)ចំនួន ២១ ៣៦១ផ្លាក។ 

ផ្អែកតាមតារាងស្ថានភាពចំណូល រួមទាំងចំនួនផ្លាកលេខពិសេស និងផ្លាកលេខពិសេសផ្ទាល់ខ្លួន បានចុះបញ្ជីក្នុងរយៈពេល៥ឆ្នាំចុងក្រោយ ពោលពីឆ្នាំ២០១៩-២០២៣ ក្រសួងសាធារណការ ទទួលបានចំណូលសរុប ៣៤៧ ៦២៧លានរៀល (ប្រមាណ៨៥លានដុល្លារ)។

គួរជម្រាបថា ក្នុងឆ្នាំ២០២៣ ក្រសួងបានចុះបញ្ជីយានយន្តសរុបចំនួន ៦៥២ ១៦៣គ្រឿង ដោយរួមបញ្ចូលទាំងយានយន្តដើរដោយថាមពលអគ្គិសនី (EV) ចំនួន ៦០៤គ្រឿងផងដែរ។ ជាមួយគ្នានេះ ក្រសួង ក៏បានសាងសង់ និងដាក់ឱ្យប្រើប្រាស់ស្ថានីយសាកថ្មយានយន្តដើរដោយថាមពលអគ្គិសនី (EV) មានចំនួន ១៨ទីតាំង៕