ភ្នំពេញ៖ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ណែនាំឱ្យប្រជាកសិករនៅឃុំស្រះរាំង ស្រុកមង្គលបូរី និងឃុំស្លក្រាម ស្រុកស្វាយចេក ខេត្តបន្ទាយមានជ័យ ចងក្រងបង្កើតជាសហគមន៍ទំនើបដាំ «ស្រូវសែនក្រអូប» និងធ្វើផលិតកម្មតាមកិច្ចសន្យា។

ក្នុងឱកាសដឹកនាំក្រុមការងារចុះពិនិត្យស្ថានភាពប្រមូលផល និងការប្រមូលទិញស្រូវនិងពោត របស់ប្រជាកសិករ ព្រមទាំងជួបសំណេះសំណាលជាមួយម្ចាស់រោងម៉ាស៊ីនកិនស្រូវ ឯកឧត្តម ប្រាក់ ដាវីដ បានស្តាប់អំពីបញ្ហានានា ដែលពួកគាត់ជួបប្រទះ និងពិភាក្សារកដំណោះស្រាយ សម្រាប់ពេលបច្ចុប្បន្ន និងអនាគត ក្នុងនោះមានបញ្ហាពូជស្រូវ បច្ចេកទេស និងទីផ្សារ ព្រមទាំងការវិភាគសេដ្ឋកិច្ចលើចំណូលចំណាយ។

រោងម៉ាស៊ីន គឺនៅតែទទួលទិញ ដោយផ្តល់តម្លៃសមរម្យ តាមគុណភាពស្រូវប្រភេទស្រង៉ែដល់កសិករ ហើយម្ចាស់រោងម៉ាស៊ីន ក៏បានអរគុណ ចំពោះរាជរដ្ឋាភិបាលកម្ពុជា តាមរយៈធនាគារអភិវឌ្ឍន៍ជនបទ និងកសិកម្ម ដែលបានផ្តល់ថវិកាកម្ចី និងធានាបន្តទិញស្រូវ រហូតអស់ទុន។ នេះបើតាមការចុះផ្សាយរបស់ ក្រសួងកសិកម្ម នាថ្ងៃទី១៦ ខែសីហា ឆ្នាំ២០២៥៕