ភ្នំពេញ៖ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា សុទិដ្ឋិនិយមខ្ពស់ថា គណៈប្រតិភូសហព័ន្ធធុរកិច្ចសិង្ហបុរី (SBF) នឹងចាប់ផ្តើមមានការជឿជាក់ ហើយអាចឈានទៅពង្រីកមូលដ្ឋានអាជីវកម្មរបស់ខ្លួនមកកាន់កម្ពុជានាពេលដ៏ខ្លីខាងមុខក្នុងវិស័យជាក់លាក់ណាមួយ។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី៣១ ខែកក្កដា ឆ្នាំ២០២៥។

ជាមួយគ្នានេះ ឯកឧត្តម ជា វុទ្ធី បានបញ្ជាក់ពីភាពជោគជ័យនៃគោលនយោបាយអភិវឌ្ឍន៍តំបន់សេដ្ឋកិច្ចពិសេសនៅកម្ពុជា ដែលត្រូវបានដាក់ចេញតាំងពីចុងឆ្នាំ២០០៥ ហើយមកទល់បច្ចុប្បន្ននេះ តំបន់សេដ្ឋកិច្ចពិសេសបានដើរតួនាទីយ៉ាងសំខាន់ក្នុងការធ្វើពិពិធកម្មឧស្សាហកម្មនៅកម្ពុជា។ ជាក់ស្តែង គម្រោងវិនិយោគក្នុងតំបន់សេដ្ឋកិច្ចពិសេសភាគច្រើន ជាគម្រោងវិនិយោគមិនមែនជាឧស្សាហកម្មកាត់ដេរសម្លៀកបំពាក់ ស្បែកជើង និងសម្ភារធ្វើដំណើរ ផ្ទុយទៅវិញជាគម្រោងដែលមានតម្លៃបន្ថែមខ្ពស់ជាងមុន និងប្រើបច្ចេកវិទ្យាទំនើប ដូចជា ការផលិតសំបកកង់រថយន្ត ផ្គុំដំឡើងយានយន្ត ផ្គុំដំឡើងកង់ សម្ភារបរិក្ខារអគ្គិសនី គ្រឿងអេឡិចត្រូនិក គ្រឿងសង្ហារិម។

ឯកឧត្តម ជា វុទ្ធី បានលើកឡើងអំពីគំនិតផ្ដួចផ្ដើមរបស់សម្ដេចធិបតី ហ៊ុន ម៉ាណែត ក្នុងការបង្កើតសួនឧស្សាហកម្មស្វាយចន្ទី ហើយរាជរដ្ឋាភិបាលនឹងផ្តល់ការគាំទ្រ និងការលើកទឹកចិត្តពិសេសនានាដើម្បីជួយបង្កើនភាពអំណោយផលនៃបរិយាកាសធុរកិច្ចក្នុងវិស័យអាទិភាពនេះនៅកម្ពុជា។ គួរបញ្ជាក់ថា គណៈប្រតិភូ SBF ដែលបានអញ្ជើញមកធ្វើទស្សនកិច្ចដោយផ្ទាល់នាឱកាសនេះជាសហគ្រាសដែលមានមុខសញ្ញាវិនិយោគក្នុងវិស័យកម្មន្តសាល, សុខាភិបាល, ទេសចរណ៍, បដិសណ្ឋារកិច្ច, អប់រំ, ព័ត៌មានវិទ្យា, កសិ-ចំណីអាហារ និងសេវា៕