ភ្នំពេញ៖ នៅខែមករា ឆ្នាំ២០២៤ កម្ពុជា រកចំណូលបានពីការលក់បណ្ណចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្លៀស សរុបជាង ៥,៤៩ លានដុល្លារ កើនឡើង៥០,៩០% បើធៀបនឹងរយៈពេលដូចគ្នាឆ្នាំ២០២៣ ក្នុងនោះ មានចំនួនភ្ញៀវទេសចរអន្តរជាតិសរុបជាង១១,៥ម៉ឺននាក់ កើនបាន ៤៩,២០%។

តាមការចុះផ្សាយរបស់គ្រឹះស្ថានអង្គរ កាលពីដើមខែកុម្ភៈ បានបញ្ជាក់ថា ចំណូលបានមកពីការលក់បណ្ណនៅប្រាសាទកោះកែរ ក្នុងខែមករា មានចំនួនជាង ៤៣ពាន់ដុល្លារ និងទទួលបានភ្ញៀវបរទេសសរុប ២ ៨៩៤នាក់។

ចំពោះ ចំណូលពីការលក់សំបុត្រទូក ប្រចាំខែមករា មានទំហំជាង ១០ ម៉ឺនដុល្លារ ក្នុងនោះ មានទូកតូចចំនួន ១ ៩១៦, ទូកកណ្តាលចំនួន ១ ១៤៤ និងទូកធំមានចំនួន ១៤៣។ រីឯ ចំណូលឧបត្ថម្ភមូលនិធិ គន្ធបុប្ផាកម្ពុជា ក្នុងខែមករា ទទួលបានចំនួនជាង ២៣ម៉ឺនដុល្លារ៕