ភ្នំពេញ៖ កម្ពុជា-ថៃ ឯកភាពឈប់បាញ់បន្ទាន់ ដោយឥតលក្ខខណ្ឌ នៅម៉ោង ១២:០០អធ្រាត្រ ថ្ងៃទី២៨ កក្កដា។ បទឈប់បាញ់នេះ ព្រមព្រៀងដោយ សម្តេចធិបតី ហ៊ុន ម៉ាណែត និង ឯកឧត្ដម Phumtham Wechayachai នាយករដ្ឋមន្ត្រីស្តីទីថៃ នៅប្រទេសម៉ាឡេស៊ី។

ក្រៅពីបញ្ឈប់សង្រ្គាម ភាគីកម្ពុជា-ថៃ បានឯកភាពគ្នារៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ ដោយភាគីថៃ មានយោធភូមិភាគទី១, ទី២ និងភាគីកម្ពុជា មានយោធភូមិភាគទី៤, ទី៥ នៅម៉ោង០៧:០០ព្រឹក ថ្ងៃទី២៩ ខែកក្កដា ឆ្នាំ២០២៥។ លើសពីនេះ បើសិនមានការឯកភាពពីភាគីទាំងពីរ កម្ពុជា និងថៃ នឹងបន្តរៀបចំកិច្ចប្រជុំជាមួយបណ្តាសេនានុព័ន្ធ និងអនុព័ន្ធយោធា ដឹកនាំដោយប្រធានអាស៊ាន។

ភាគីទាំងពីរ ក៏នឹងរៀបចំកិច្ចប្រជុំគណៈកម្មាធិការព្រំដែនទូទៅ (GBC) នៅថ្ងៃទី៤ ខែសីហា ឆ្នាំ២០២៥ ផងដែរ ដែលកម្ពុជា នឹងធ្វើជាម្ចាស់ផ្ទះ។ សូមជម្រាបថា កិច្ចប្រជុំសម្របសម្រួលជម្លោះរវាងកម្ពុជា និងថៃនេះ ដឹកនាំរៀបចំដោយ ឯកឧត្តម Anwar Ibrahim នាយករដ្ឋមន្ត្រីម៉ាឡេស៊ី និងសហរៀបចំដោយ សហរដ្ឋអាម៉េរិក ក្នុងនោះ ក៏មានការគាំទ្រពីចិន៕