ភ្នំពេញ៖ លោកសាស្រ្តាចារ្យ សៀម មុន្នីល័ក្ខ ព្រឹទ្ធបុរសមហាវិទ្យល័យសេដ្ឋកិច្ចឌីជីថលនៃសាកលវិទ្យាល័យជាតិគ្រប់គ្រង បានស្នើឱ្យក្រសួងកសិកម្ម រុក្ខាប្រមាញ់ និងនេសាទ ពិនិត្យផ្តល់ឱកាសដល់សិស្សនិស្សិតចុះកម្មសិក្សាជាមួយក្រសួង។ នេះបើតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ នាថ្ងៃទី២៣ ខែកក្កដា ឆ្នាំ២០២៥។

ក្នុងឱកាសបំពេញទស្សនកិច្ចនៅក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២២ ខែកក្កដា ឆ្នាំ២០២៥ ក្នុងគោលបំណងស្វែងយល់អំពីការវិវត្តនៃការប្រើប្រាស់បច្ចេកវិទ្យា ការធ្វើឌីជីថលូបនីយកម្ម និងការជំរុញការងារបរិវត្តកម្មឌីជីថលទាំងក្នុងក្រសួង និងក្នុងវិស័យកសិកម្ម។ ការផ្តល់ឱកាសដល់និស្សិតក្នុងការចុះកម្មសិក្សាជាមួយក្រសួង សាស្រ្តាចារ្យ លោកគ្រូ អ្នកគ្រូ និងនិស្សិត គឺមានការចាប់អារម្មណ៍ជាខ្លាំងលើការវិវត្តជាបន្តបន្ទាប់ដែលក្រសួងបាន និងកំពុងសម្រេចពិសេសលើការចាប់យក និងប្រើប្រាស់បច្ចេកវិទ្យាឌីជីថលក្នុងវិស័យកសិកម្ម។

កិច្ចពិភាក្សានេះ ក្នុងនោះឯកឧត្តម សៀក ឡេង អនុរដ្ឋលេខាធិការក្រសួងកសិកម្ម ក៏បានគូសបញ្ជាក់អំពីសមទ្ធផលការងារសំខាន់ៗនៅក្នុងវិស័យកសិកម្មដែលក្រសួងសម្រេចបាន និងចូលរួមចំណែកក្នុងការអភិវឌ្ឍសេដ្ឋកិច្ចជាតិ និងគាំទ្រការអនុវត្តគោលនយោបាយអាទិភាពរបស់រាជរដ្ឋាភិបាលកម្ពុជា។

ឯកឧត្តម សៀក ឡេង បានលើកឡើងអំពីការវិវត្តនៃបច្ចេកវិទ្យាឌីជីថលក្នុងវិស័យកសិកម្ម ដែលក្រសួងបាន និងកំពុងយកចិត្តទុកទាក់ពង្រឹងយ៉ាងសកម្ម ពិសេសលើការធ្វើអភិបាលកិច្ចល្អ និងធនធានមនុស្សឌីជីថល ការចាប់យកនិងអភិវឌ្ឍន៍បច្ចេកវិទ្យាឌីជីថល ដូចជាថ្នាល និងកម្មវិធីនានា ការកសាងហេដ្ឋារចនាសម្ព័ន្ធ និងការផ្តល់សេវាតាមប្រព័ន្ធឌីជីថលឱ្យកាន់តែល្អប្រសើរ និងមានភាពងាយស្រួលសម្រាប់ប្រជាជន និងធុរជនជាដើម៕