ភ្នំពេញ៖ សមាជិកសហគមន៍កសិកម្មបន្លែសុវត្ថិភាព នៅក្នុងឃុំរហាត់ទឹកស្រុកមង្គលបុរី និងសហគមន៍កសិកម្មប្រាសាទបន្ទាយឆ្មារ ស្រុកថ្មពួក ខេត្តបន្ទាយមានជ័យ មានបំណងប្រែក្លាយសហគមន៍ទៅជាសហគមន៍កសិកម្មទំនើប។ នេះបើតាមការចុះផ្សាយរបស់ ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១៨ ខែមិថុនា ឆ្នាំ២០២៥។

ក្នុងឱកាសជួបសំណេះសំណាលជាមួយថ្នាក់ដឹកនាំ និងសមាជិកសហគមន៍កសិកម្មបន្លែសុវត្ថិភាពទាំងពីរខាងលើ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ, ឯកឧត្តម ឃឹម ហ្វីណង់ អនុរដ្ឋលេខាធិការ, លោកស្រី ឡុង តាបនា អនុប្រធានមន្ទីរកសិកម្មខេត្ត បានស្វែងយល់ពីការអភិវឌ្ឍរបស់សហគមន៍ និងបញ្ជ្រាបពីទស្សនាទានសហគមន៍កសិកម្មទំនើប រួមទាំងពិនិត្យលទ្ធភាពរបស់សហគមន៍ក្នុងការរប្រែក្លាយជាសហគមន៍កសិកម្មទំនើបផងដែរ។

គួរបញ្ជាក់ថា សមាជិកសហគមន៍កសិកម្មបន្ទាយឆ្មារ សន្យាថា នឹងមានការពិភាក្សាលម្អិតឆាប់ៗក្នុងដំណើរការប្រែក្លាយជាសហគមន៍ទំនើប៕