ភ្នំពេញ៖ ការស្រាវជ្រាវ និងនវានុវត្តន៍ឌីជីថល ជាយុទ្ធសាស្ត្រដ៏សំខាន់ ដើម្បីបង្កើនសមត្ថភាព ប្រសិទ្ធភាព និងប្រសិទ្ធផលនៃបរិវិត្តកម្មឌីជីថល និងធានាការប្រកួតប្រជែងឌីជីថលក្នុងតំបន់ ដូចនេះរាជរដ្ឋាភិបាលកម្ពុជា បានជំរុញការកសាងប្រព័ន្ធជាតិស្រាវជ្រាវនិងអភិវឌ្ឍបច្ចេកវិទ្យាឌីជីថល តាមរយៈការរៀបចំផែនការមេយន្តការ នៃការលើកទឹកចិត្ត និងការជំរុញភាពជាដៃគូរវាងគ្រឹះស្ថានស្រាវជ្រាវ សាកលវិទ្យាល័យ និងក្រុមហ៊ុនបច្ចេកវិទ្យា ឌីជីថល ដើម្បីលើកកម្ពស់សកម្មភាពស្រាវជ្រាវនិងអភិវឌ្ឍបច្ចេកវិទ្យាឌីជីថល។

ជាមួយគ្នានេះ ដើម្បីបង្កើនសមត្ថភាព ប្រសិទ្ធភាព និងប្រសិទ្ធភាព រាជរដ្ឋាភិបាលជំរុញលើការផ្ទេរបច្ចេកវិទ្យាឌីជីថលដែលជាលទ្ធផលពីការស្រាវជ្រាវដល់វិស័យសាធារណៈនិងឯកជន តាមរយៈការរៀបចំកិច្ចសហការ ការវិនិយោគ និងការអនុវត្តគម្រោងរួមគ្នារវាងគ្រឹះស្ថានស្រាវជ្រាវនិងអប់រំជាមួយវិស័យ ឯកជន ដើម្បីផ្តល់ដំណោះស្រាយបច្ចេកវិទ្យាឌីជីថលឱ្យបានទូលំទូលាយ និងសម្បូរបែប។

បន្ថែមលើនេះ រាជរដ្ឋាភិបាល ក៏បានជំរុញសហគ្រិនភាពនៃនវានុវត្តន៍ឌីជីថល តាមរយៈកិច្ចសហប្រតិបត្តិការជាមួយស្ថាប័នជាតិនិងអន្តរជាតិ និងវិស័យឯកជន ការរៀបចំយន្តការទទួលស្គាល់នវានុវត្តន៍ថ្មីៗ កម្មវិធីប្រកួតប្រជែង ការការពារកម្មសិទ្ធិបញ្ញា ជាដើម ដើម្បីយកលទ្ធផលចេញពីនវានុវត្តន៍ទៅប្រើប្រាស់ក្នុងវិស័យសាធារណៈនិងឯកជន និងធានាឧត្តមភាពប្រកួត ប្រជែងឌីជីថលផងដែរ៕

ប្រភពពី៖ គោលនយោបាយរដ្ឋាភិបាលឌីជីថលកម្ពុជា ២០២២-២០៣៥