ភ្នំពេញ៖ ក្រុមហ៊ុនរបស់ចិនចំនួន២ គឺក្រុមហ៊ុន Guangxi Xiyaya Food Co., Ltd. និងក្រុមហ៊ុន Lumisun Asian Fruits Co., Ltd. បានចុះហត្ថលេខាជាមួយក្រសួងពាណិជ្ជកម្ម លើកិច្ចព្រមព្រៀងសហការជាយុទ្ឋសាស្ត្រសម្រាប់ទិញ-លក់ដំណាប់ស្វាយកម្ពុជាចំនួន ២០ម៉ឺនតោន ក្នុងឆ្នាំ២០២៥-២០២៧ និងទិញទុរេនកម្ពុជាចំនួន ១៥ម៉ឺនតោន ក្នុងឆ្នាំ២០២៥-២០២៦ ដោយឡែកសម្រាប់ឆ្នាំ២០២៥នេះ ភាគីចិន នឹងទិញដំណាប់ស្វាយកម្ពុជាចំនួន ៣ពាន់តោន។

ការចុះហត្ថលេខាលើកិច្ចព្រមព្រៀងក្នុងការទិញ-លក់ទិញទុរេន និងដំណាប់ស្វាយពីកម្ពុជាសរុបចំនួន ៣៥ ម៉ឺនតោននេះ ត្រូវបានធ្វើឡើងក្នុងព្រឹត្តិការផ្សព្វផ្សាយទំនិញកសិផលកម្ពុជា និងការចុះកិច្ចព្រមព្រៀងកិច្ចសហប្រតិបត្តិការជាយុទ្ធសាស្រ្ត រវាងក្រុមហ៊ុនកម្ពុជា និងចិន កាលពីថ្ងៃទី៦ ខែមិថុនា ឆ្នាំ២០២៥ ដោយឯកឧត្តម លីម ឡោកពិសិដ្ឋ រដ្ឋលេខាធិការក្រសួងពាណិជ្ជកម្ម និងលោកស្រី Zeng Ling អភិបាលរងទីក្រុងប៉ីហៃ។ នេះបើយោងតាមការចុះផ្សាយរបស់ក្រសួងពាណិជ្ជកម្ម នាថ្ងៃទី៧ ខែមិថុនា ឆ្នាំ២០២៥៕