ភ្នំពេញ៖ ឯកឧត្តម រដ្ឋ សារ៉ាវុធ រដ្ឋលេខាធិការក្រសួងពាណិជ្ជកម្ម ស្នើឱ្យឯកឧត្តម Ricardo Estanislao Morote Canales ឯកអគ្គរដ្ឋទូតប្រទេសប៉េរូប្រចាំកម្ពុជា ពិនិត្យលទ្ធភាពជំរុញអ្នកវិនិយោគប៉េរូ មកវិនិយោគនៅកម្ពុជាលើវិស័យឧស្សាហកម្ម និងទេសចរណ៍ និងនាំចេញផលិតផលកៅស៊ូ អង្ករ របស់កម្ពុជាបន្ថែមទៀត។

ក្នុងជំនួបពិភាក្សាការងារកាលពីថ្ងៃទី៤ ខែមិថុនា ឆ្នាំ២០២៥ ភាគីទាំងពីរ បានពិភាក្សាអំពីកិច្ចសហប្រតិបត្តិការវិនិយោគ និងការជំរុញពាណិជ្ជកម្មទ្វេភាគីដែលមានសក្តានុពលនៅក្នុងប្រទេសទាំងពីរ ជាពិសេសក្នុងវិស័យកសិកម្ម និងកសិឧស្សាហកម្ម ដូចជា ផលិតផលស្រូវ និងកៅស៊ូ ជាដើម ដើម្បីបង្កើនទំហំពាណិជ្ជកម្មរវាងប្រទេសទាំងពីរ។

ជាមួយគ្នានេះ ឯកឧត្តម Ricardo Estanislao Morote Canales បានសន្យានឹងចែករំលែកការពិភាក្សានេះទៅកាន់វិស័យឯកជនរបស់ប្រទេសប៉េរូ ដោយសំដៅសិក្សាអំពីលទ្ធភាពមកវិនិយោគនៅកម្ពុជា ក្នុងវិស័យទាំងនេះ។ នេះបើតាមការចុះផ្សាយរបស់ក្រសួងពាណិជ្ជកម្មនាថ្ងៃទី៤ ខែមិថុនា ឆ្នាំ២០២៥៕