ភ្នំពេញ៖ លោក ឆាយ ជាហេង អនុប្រធាននាយកដ្ឋានគ្រប់គ្រងអ្នកជាប់ពន្ធធំ និងលោក ឯក ពិសិដ្ឋ ប្រធានការិយាល័យ នៃនាយកដ្ឋានគ្រប់គ្រងអ្នកជាប់ពន្ធធំ លើកឡើងថា ការផ្គត់ផ្គង់ទំនិញ និងសេវាទាំងអស់ មិនសុទ្ធតែត្រូវជាប់អាករលើតម្លៃបន្ថែមនោះទេ ពោលគឺការផ្គត់ផ្គង់ ដែលចាត់ទុកជាការផ្គត់ផ្គង់ជាប់អាករមានដូចខាងក្រោម៖

១. ការផ្គត់ផ្គង់ទំនិញ ឬសេវាដោយបុគ្គលជាប់អាករនៅកម្ពុជា, ២. ការដកយកទំនិញ ឬសេវាមកប្រើប្រាស់ផ្ទាល់ខ្លួនដោយបុគ្គលជាប់អាករ, ៣. ការផ្តល់ជាអំណោយ ឬការផ្គត់ផ្គង់ក្រោមតម្លៃពិតនូវទំនិញឬសេវាដោយបុគ្គលជាប់អាករ, ៤. ការផ្គត់ផ្គង់ទំនិញឌីជីថល ឬសេវាឌីជីថលមកក្នុងព្រះរាជាណាចក្រកម្ពុជា ដូចមានចែងក្នុងមាត្រា៥៨ នៃច្បាប់ស្តីពីសារពើពន្ធ និង៥. ការនាំចូលទំនិញមកក្នុងដែនគយនៃព្រះរាជាណាចក្រកម្ពុជា។

ដោយឡែក ការផ្គត់ផ្គង់មួយចំនួន ដែលត្រូវចាត់ទុកថា ជាការផ្គត់ផ្គង់មិនជាប់អាករ មានដូចជា៖ សេវាសិក្សាអប់រំ សេវាប្រៃសណីយ៍សាធារណៈ សេវារបស់មន្ទីរពេទ្យនិងគ្លីនិក សេវាខាងវេជ្ជសាស្ត្រ និងការលក់ទំនិញបន្ទាប់បន្សំខាងវេជ្ជសាស្ត្រនិងទន្តសាស្ត្រដែលទាក់ទិននឹងការ បំពេញសេវាទាំងនេះ, សេវាដឹកជញ្ជូនអ្នកដំណើរដោយប្រព័ន្ធដឹកជញ្ជូនសាធារណៈ ដែលជាកម្មសិទ្ធិទាំងស្រុងរបស់រដ្ឋ និងសេវាធានារ៉ាប់រង។

ការផ្គត់ផ្គង់ថាមពលអគ្គិសនីនិងការផ្គត់ផ្គង់ទឹកស្អាត, ផលិតផលកសិកម្មមិនទាន់កែច្នៃផលិតក្នុងស្រុក, សេវាប្រមូលសំរាមនិងកាកសំណល់រឹង ឬរាវ, សេវាជាមូលដ្ឋានខាងហិរញ្ញវត្ថុដែលត្រូវកំណត់ដោយប្រកាសរបស់រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ, ការនាំចូលសម្ភារប្រើប្រាស់ផ្ទាល់ខ្លួនដែលរួចពន្ធគយក្នុងកម្រិតតម្លៃដែលត្រូវកំណត់ដោយប្រកាសរបស់រដ្ឋមន្ត្រីក្រសួងសេដ្ឋកិច្ចនិង ហិរញ្ញវត្ថុ និងសកម្មភាពមិនស្វែងរកប្រាក់ចំណេញ ដើម្បីបម្រើផលប្រយោជន៍សាធារណៈ ដែលបានទទួលស្គាល់ដោយរដ្ឋមន្ត្រីក្រសួងសេដ្ឋកិច្ចនិង ហិរញ្ញវត្ថុ៕