ភ្នំពេញ៖ កម្មវិធីបរិវត្តកម្មឌីជីថលសហគ្រាស ត្រូវបានរៀបចំឡើងក្នុងគោលបំណងពង្រឹងសមត្ថភាពឌីជីថលរបស់សហគ្រាស ដើម្បីជំរុញឱ្យសហគ្រាសគ្រប់កម្រិត អាចក្លាយជាភ្នាក់ងារដ៏សកម្មនៅក្នុងសេដ្ឋកិច្ច និងធុរកិច្ចឌីជីថល ព្រមទាំងបង្កើនការរួមចំណែករបស់វិស័យឯកជនក្នុងការអភិវឌ្ឍសេដ្ឋកិច្ច និងធុរកិច្ចឌីជីថល ប្រកបដោយភាពធន់ ចីរភាព និងបរិយាបន្ន។

បន្ថែមលើនេះ ការរៀបកម្មវិធីបរិវត្តកម្មឌីជីថលសហគ្រាស បានកំណត់គោលដៅដែលជាលទ្ធផលរំពឹងទុក នៃការដាក់ឱ្យអនុវត្តកម្មវិធីបរិវត្តកម្មឌីជីថលហគ្រាស មានចំនួន៣ ដូចជា៖ ទី១, បង្កើនការផ្តល់ផលិតផល ឬសេវាកម្មឌីជីថលប្រកបដោយគុណភាពតាមវិស័យនៅលើថ្នាលបរិវត្តកម្មឌីជីថលសហគ្រាស។ ទី២, លើកកម្ពស់លទ្ធភាពទទួលបានព័ត៌មាន, បង្កើនការយល់ដឹងអំពីបរិវត្តកម្មឌីជីថល និងការបណ្តុះបណ្តាលដល់សហគ្រាស និងទី៣, លើកកម្ពស់ការប្រើប្រាស់ផ្ទាលឌីជីថលរបស់រាជរដ្ឋាភិបាល៕