ភ្នំពេញ៖ ក្រសួងទេសចរណ៍ ក្រុមហ៊ុន Ubrain Communications របស់ប្រទេសកូរ៉េ និងក្រុមហ៊ុន Thananvarman Digital 21 ចុះអនុស្សរណៈនៃការយោគយល់គ្នា (MoU) ស្តីពីការបណ្តុះបណ្តាលជំនាញផលិតមាតិកាទេសចរណ៍ (Tourism Content Creator or Travel Content Creator) ដល់សិស្ស និស្សិត និងអ្នកមានចំណង់ចំណូលចិត្តផលិតមាតិកាឌីជីថល (Digital Content) ដែលជាការបណ្តុះបណ្តាលដំបូងគេនៅកម្ពុជា។

តាមរយៈការបណ្តុះបណ្តាលនេះ សិក្ខាកាម នឹងទទួលបានចំណេះដឹងពីការផលិតមាតិកាថ្មី បទពិសោធជាក់ស្តែង កម្មវិធីឌីជីថលថ្មីៗ ដែលបានពីគ្រូឧទ្ទេសនាមល្បី និងមានបទពិសោធច្រើនឆ្នាំពីប្រទេសកូរ៉េ ជាពិសេសគឺការរៀបចំមាតិកាទេសចរណ៍ ប្រកបដោយគុណភាពខ្ពស់ និងមានភាពទាក់ទាញលំដាប់អន្តរជាតិ។ ចំពោះសិក្ខាកាម ដែលបញ្ចប់ការសិក្សាវគ្គនេះដោយជោគជ័យ នឹងទទួលបាននូវវិញ្ញាបនប័ត្រទទួលស្គាល់សម្រាប់អាជីពការងាររបស់ខ្លួន។ គួរបញ្ជាក់ថា ពិធីចុះ MoU នេះ កាលពីថ្ងៃទី២៧ ខែឧសភា ឆ្នាំ២០២៥ ធ្វើឡើងក្រោមអធិបតីភាព ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍៕