ភ្នំពេញ៖ ផលិតផលចេកក្រៀម គ្រាប់ស្វាយចន្ទី ដំណាប់ស្វាយ ម្រេច វត្ថុសិល្បៈ និងគោលដៅទេសចរណ៍ នៅកម្ពុជា ដែលបានរៀបចំដាក់បង្ហាញដោយលោកស្រី នួន ផានិត អនុព័ន្ធពាណិជ្ជកម្មអមស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ នៅក្នុងកម្មវិធីពិធីបុណ្យមិត្តភាពទីក្រុងសេអ៊ូល (Seoul Friendship Festival) ទទួលបានការចាប់អារម្មណ៍ពីអ្នកទស្សនាយ៉ាងច្រើនកុះករ។

ក្នុងកម្មវិធី ដែលធ្វើឡើងរយៈពេល២ថ្ងៃ គឺកាលពីថ្ងៃទី២៤ និងទី២៥ ខែឧសភា ឆ្នាំ២០២៥ ដែលរៀបចំដោយសាលាក្រុងសេអ៊ូល the Seoul Metropolitan Government (SMG) សហការជាមួយសា្ថនទូតនានាប្រចាំនៅកូរ៉េ ស្ថានទូតកម្ពុជាប្រចាំទីក្រុងសេអ៊ូល ក៏បានរៀបចំស្តង់ផ្សព្វផ្សាយផលិតផលសក្តានុពលសម្រាប់នាំចេញ វត្ថុអនុស្សារីយ៍ វប្បធម៌ ទេសចរណ៍ ស្តង់ម្ហូបអាហារ (នំបញ្ចុក សាច់គោអាំង នំគម និងនំអន្សម) និងការសម្ដែងសិល្បៈ ដែលទទួលបានការចាប់អារម្មណ៍ និងអ្នកទស្សនាបានទិញអាហាររបស់ខ្មែរយ៉ាងច្រើនផងដែរ។

ក្នុងព្រឹត្តិការណ៍នេះ ក៏មានការសម្តែងសិល្បៈវប្បធម៌ពិភពលោកចំនួន ១២ក្រុម ស្តង់តាំងបង្ហាញផ្សព្វផ្សាយផលិតផលរបស់ស្ថានទូតចំនួន ៤៦ស្តង់ ម្ហូបអាហារ ៤៨ស្តង់ លក់បង្អែម និងសកម្មភាពផ្សេងៗនៅក្នុង K-Culture Zone ព្រមទាំងការសម្ដែងសិល្បៈវប្បធម៌ចម្រុះជាតិសាសន៍ជុំវិញពិភពលោក ក្រោមប្រធានបទ «ទីក្រុងសេអ៊ូល និងពិភពលោក ការរួមគ្នាតាមរយៈវប្បធម៌» នៅទីតាំង Dongdaemun Design Plaza ផងដែរ៕