ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា(CDC) សង្ឃឹមថា គណៈប្រតិភូនៃការិយាល័យទីប្រឹក្សានៃក្រុមប្រឹក្សារដ្ឋដែលជាស្ថាប័នបណ្តុំគំនិតរបស់រដ្ឋាភិបាលចិន នឹងជួយពាំនាំព័ត៌មានវិជ្ជមានរបស់កម្ពុជា ដល់សហគមន៍ធុរកិច្ចគ្រប់លំដាប់ថ្នាក់ ដើម្បីពង្រីកខ្សែច្រវាក់ផលិតកម្មរបស់ខ្លួននៅកម្ពុជាបន្ថែមទៀត។ នេះបើតាមការលើកឡើងរបស់ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា នៃCDC។

ក្នុងជំនួបជាមួយឯកឧត្តម សួន សុផល លោក Wang Weimin អនុប្រធានការិយាល័យទីប្រឹក្សានៃក្រុមប្រឹក្សារដ្ឋចិន បានអរគុណដល់ក្រុមការងារគណៈកម្មាធិការវិនិយោគកម្ពុជា ដែលបានទទួលជួបពិភាក្សាការងារនាឱកាសដំណើរទស្សនកិច្ចការងារលើកដំបូងមកកាន់កម្ពុជា។ លោក Wang Weimin ក៏បានពេញចិត្តអំពីវឌ្ឍនភាពចុងក្រោយនៃបរិស្ថានធុរកិច្ចនៅកម្ពុជា និងមានជំនឿចិត្តថាសហគ្រាសចិនក្រោមគំនិតផ្តួចផ្តើមខ្សែក្រវាត់-ផ្លូវ នឹងបន្តពង្រីកការវិនិយោគរបស់ខ្លួននៅតាមបណ្តោយរបៀងអភិវឌ្ឍន៍ឧស្សាហកម្មកម្ពុជាបន្ថែមទៀត។

នាជំនួបពិភាក្សាលើការលើកកម្ពស់ និងការឈ្វេងយល់អំពីបច្ចុប្បន្នភាពថ្មីនៃបរិយាកាសវិនិយោគកម្ពុជា នោះ ឯកឧត្តម សួន សុផល បានបញ្ជាក់ថា គម្រោងវិនិយោគផ្ទាល់របស់ចិននៅកម្ពុជា តែងតែឈរនៅលំដាប់លេខរៀងកំពូលជានិច្ចក្នុងរយៈពេល១ទសវត្សរ៍ចុងក្រោយ ដោយបានវិនិយោគលើវិស័យជាច្រើន៕