ភ្នំពេញ៖ ក្រសួងសាធារណការ និងដឹកជញ្ជូននៃប្រទេសកម្ពុជា និងប្រទេសឡាវ បានបើកកិច្ចប្រជុំផ្លាស់ប្ដូរបទពិសោធរវាងគ្នាក្នុងការរៀបចំផែនការលើវិស័យឡូជីស្ទីក វិស័យដឹកជញ្ជូន និងការតភ្ជាប់ ព្រមទាំងពិភាក្សាលើកាលានុវត្តភាពលើកិច្ចសហការរវាងក្រសួងទាំងពីរនាពេលអនាគត។ នេះបើតាមការចុះផ្សាយរបស់ក្រសួងសាធារណការ និងដឹកជញ្ជូន កាលពីថ្ងៃទី២១ ខែមេសា ឆ្នាំ២០២៥។

ក្រោមកិច្ចសម្របសម្រួលពីអគ្គនាយកដ្ឋានភស្ដុភារកម្ម នៃក្រសួងសាធារណការ គណៈប្រតិភូក្រសួងសាធារណការ និងដឹកជញ្ជូនឡាវ គ្រោងនឹងចុះទស្សនកិច្ចផ្ទាល់នៅកំពង់ផែស្វយ័តភ្នំពេញ កំពង់ផែស្វយ័តក្រុងព្រះសីហនុ និងតំបន់សេដ្ឋកិច្ចពិសេសក្នុងខេត្តព្រះសីហនុ ដែលជាតំបន់ប្រមូលផ្ដុំហេដ្ឋារចនាសម្ព័ន្ធដ៏មានសក្ដានុពលរបស់ប្រទេសកម្ពុជាផងដែរ។

គួរបញ្ជាក់ថា កិច្ចប្រជុំផ្លាស់ប្ដូរការរៀបចំយុទ្ធសាស្ត្រជាមួយគណៈប្រតិភូក្រសួងសាធារណការឡាវ ធ្វើឡើងកាលពីថ្ងៃទី២១ ខែមេសា ឆ្នាំ២០២៥ មានការចូលរួមពីឯកឧត្តម ឈៀង ពេជ្រ អនុរដ្ឋលេខាធិការ ក្រសួងសាធារណការ និងដឹកជញ្ជូន គណៈប្រតិភូក្រសួងសាធារណការ និងដឹកជញ្ជូនកម្ពុជា រួមមានអគ្គនាយកដ្ឋានពាក់ព័ន្ធក្រោមឱវាទក្រសួងដើម្បីចូលរួមកិច្ចប្រជុំនេះផងដែរ៕