ភ្នំពេញ៖ រាជរដ្ឋាភិបាល នឹងគាំទ្រផ្នែកពន្ធដារ និងពន្ធគយ ដល់គម្រោងវិនិយោគនៅខេត្តស្ទឹងត្រែង ក្រចេះ រតនគិរី និងខេត្តមណ្ឌលគិរី ដែលបានចុះបញ្ជីជាគម្រោងវិនិយោគមានលក្ខណៈសម្បត្តិគ្រប់គ្រាន់ (គ.ល.គ.) ហើយត្រូវចាប់ផ្តើមដំណើរការ នៅក្នុងឆ្នាំ ២០២៥ ដល់ ២០២៨។

តាមរយៈ «កម្មវិធីពិសេសជំរុញការវិនិយោគក្នុងខេត្តទាំងបួន នៅភូមិភាគឦសាន ឆ្នាំ២០២៥-២០២៨» ធុរជន នឹងទទួលបានការផ្តល់ហិរញ្ញប្បទានក្រោមអត្រាការប្រាក់សមរម្យ និងការជួយកាត់បន្ថយថ្លៃដើមផលិតកម្ម, ការសម្រួលនីតិវិធី និងការគាំទ្រសកម្មភាពវិនិយោគឯកជន។ លើសពីនេះ សកម្មភាពធុរកិច្ច ដែលកំពុងដំណើរការក្នុងខេត្តទាំង៤ តែមិនទាន់បានចុះបញ្ជីពន្ធដារ ក៏អាចចុះបញ្ជីពន្ធដារដោយស្ម័គ្រចិត្ត ក្នុងឆ្នាំ២០២៥ ដើម្បីទទួលបានការលើកលែងនូវពិន័យទោសទណ្ឌ, បំណុលពន្ធ និងការផាកពិន័យជាប្រាក់ ចំពោះការមិនបានបំពេញអនុលោមភាពកន្លងមក ផងដែរ។

រាជរដ្ឋាភិបាល ក៏បានឱ្យគម្រោងវិនិយោគ ឬសកម្មភាពធុរកិច្ច ដែលមានទុនវិនិយោគសមមូលចាប់ពី ១០ម៉ឺនដុល្លារ អាចស្នើសុំចុះបញ្ជីជា គ.ល.គ. បាន ដើម្បីទទួលការលើកទឹកចិត្ត និងបានត្រៀមថវិកាមួយចំនួន ដើម្បីដាក់ចេញនូវកម្មវិធីហិរញ្ញប្បទានក្រោមអត្រាការប្រាក់សមរម្យ តាមរយៈធនាគារអភិវឌ្ឍន៍ជនបទ និងកសិកម្ម (ARDB) និងធនាគារសហគ្រាសធុនតូច និងមធ្យម កម្ពុជា (SME Bank)។

រាជរដ្ឋាភិបាល បានប្រកាសដាក់ឱ្យអនុវត្ត ជាផ្លូវការ «កម្មវិធីពិសេសជំរុញការវិនិយោគក្នុងខេត្តទាំងបួន នៅភូមិភាគឦសាន ឆ្នាំ២០២៥-២០២៨» កាលពីថ្ងៃទី៩ ខែមេសា ឆ្នាំ២០២៥ ដើម្បីពង្រីកមូលដ្ឋានសេដ្ឋកិច្ចនៅបណ្តាខេត្ត ដែលនៅឆ្ងាយពី មជ្ឈមណ្ឌលកំណើន អភិវឌ្ឍន៍វិស័យគន្លឹះ និងប្រភពកំណើនថ្មីរបស់សេដ្ឋកិច្ចជាតិ៕