ភ្នំពេញ៖ កម្ពុជា នឹងកាត់បន្ថយអត្រាពន្ធនាំចូលទំនិញពីអាម៉េរិក ១៩ប្រភេទ ដែលអត្រាពន្ធនាំចូលខ្ពស់បំផុត ជាទូទៅមានត្រឹម ៣៥% មកត្រឹមអត្រា៥% វិញ។ នេះបើតាមលិខិតរបស់ សម្តេចធិបតី ហ៊ុន ម៉ាណែត ផ្ញើរទៅ ឯកឧត្តម Donald J. Trump ប្រធានាធិបតី នៃសហរដ្ឋអាម៉េរិក ពាក់ព័ន្ធនឹងការស្នើចរចាលើការអនុវត្តពន្ធលើការនាំចេញរបស់កម្ពុជា ទៅកាន់សហរដ្ឋអាម៉េរិក។

ចំពោះមុខទំនិញទាំង១៩ ប្រភេទនោះ មានដូចជាគ្រាប់ធញ្ញជាតិ សាច់គោ បន្លែ និងផ្លែឈើស្រស់ ទឹកភេសជ្ជៈ និងយានយន្តជាដើម។ តាមរយៈលិខិត កាលពីថ្ងៃទី៤ ខែមេសា ឆ្នាំ២០២៥ សម្តចធិបតី ហ៊ុន ម៉ាណែត បានស្នើបើកការចរចាជាមួយរដ្ឋាភិបាលរបស់អាម៉េរិក ក្នុងពេលឆាប់បំផុតតាម ដែលអាចធ្វើទៅបាន និងស្នើឱ្យរដ្ឋាភិបាលអាម៉េរិក ពន្យារការអនុវត្តអត្រាពន្ធនាំចូលថ្មីនេះ ដោយក្តីអនុគ្រោះផងដែរ។ ពាក់ព័ន្ធនឹងកិច្ចការនេះ សម្តេចធិបតីនាយករដ្ឋមន្រ្តី បានឱ្យរដ្ឋមន្រ្តីក្រសួងពាណិជ្ជកម្ម ទាក់ទងជាមួយតំណាងពាណិជ្ជកម្មសហរដ្ឋអាម៉េរិក ដើម្បីអនុវត្តកិច្ចការនេះ។

កម្ពុជា ប្តេជ្ញាបន្តកិច្ចសន្ទនា ក្នុងន័យស្ថាបនា ជាមួយរដ្ឋាភិបាលអាម៉េរិក ដើម្បីជំរុញទំនាក់ទំនងពាណិជ្ជកម្មរវាងប្រទេសទាំងពីរបន្ថែមទៀត ដើម្បីឱ្យប្រជាជាតិ និងប្រជាជន អាចទទួលបានផលប្រយោជន៍ជាក់ស្តែង ពីទំនាក់ទំនងពាណិជ្ជកម្មដ៏សំខាន់នេះ។ គួរបញ្ជាក់ថា កាលពីថ្ងៃទី២ ខែមេសា ឆ្នាំ២០២៥ សហរដ្ឋអាម៉េរិក ប្រកាសដាក់អនុវត្តនូវអត្រាពន្ធនាំចូល ៤៩% លើទំនិញរបស់កម្ពុជា ចាប់ពីថ្ងៃទី៩ ខែមេសា ឆ្នាំ២០២៥ ខាងមុខនេះ៕