ភ្នំពេញ៖ កម្ពុជា និងលុចសំបួ ពិសាអាហារថ្ងៃត្រង់រួមគ្នា ដើម្បីជំរុញការពិភាក្សាអំពីទំនាក់ទំនងសេដ្ឋកិច្ច និងពាណិជ្ជកម្ម។ នេះបើតាមការចុះផ្សាយរបស់សភាពាណិជ្ជកម្មកម្ពុជា នាថ្ងៃទី២ ខែមេសា ឆ្នាំ២០២៥។

នាឱកាសពិសាអាហារថ្ងៃត្រង់រួមគ្នានោះ ភាគីលុចសំបួ បានបង្ហាញពីការប្តេជ្ញាចិត្តក្នុងការធ្វើឱ្យទំនាក់ទំនងទ្វេភាគីរវាងលុចសំបួ និងកម្ពុជា កាន់តែប្រសើរឡើងផងដែរ។ ក្នុងជំនួបពិសាអាហារថ្ងៃត្រង់ មានការចូលរួមពី អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា, ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា, លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម, ឯកឧត្តម Xavier Bettel ឧបនាយករដ្ឋមន្រ្ដី និងជារដ្ឋមន្រ្ដីការបរទេស ពាណិជ្ជកម្មបរទេស សហប្រតិបត្តិការអភិវឌ្ឍន៍ និងកិច្ចការមនុស្សធម៌ ប្រទេសលុចសំបួ។

គួរបញ្ជាក់ផងដែរថា កម្មវិធីនេះ បានប្រព្រឹត្តទៅក្រោមអធិបតីភាពរបស់ ព្រះអង្គម្ចាស់ Guillaume Jean Joseph Marie រជ្ជទាយាទ នៃប្រទេសលុចសំបួ៕