ភ្នំពេញ៖ ឯកឧត្តម Takahashi Fumiaki ប្រធានសមាគមជប៉ុន-កម្ពុជា ព្រមទាំងវិនិយោគិនជប៉ុនមួយចំនួន ដែលកំពុងវិនិយោគនៅកម្ពុជា ក្នុងវិស័យកសិកម្ម កសិឧស្សាហកម្ម វារីវប្បកម្ម ពាណិជ្ជកម្ម និងបច្ចេកវិទ្យា បានបង្ហាញនូវគំនិតផ្តួចផ្តើមរៀបចំជាយន្តការជាក់លាក់មួយ ដើម្បីជំរុញឱ្យសហគ្រាសធុនតូច និងមធ្យម (SMEs) ពីប្រទេសជប៉ុនមកវិនិយោគនៅកម្ពុជា។

បើតាមការចុះផ្សាយរបស់ទីស្តីការគណៈរដ្ឋមន្ត្រី ភាគីជប៉ុន ក៏បានលើកឡើងពីឆន្ទៈពង្រីកការវិនិយោគរបស់ខ្លួននៅកម្ពុជាបន្ថែមទៀតផងដែរ។ ក្នុងជំនួប កាលពីថ្ងៃទី១ ខែមេសា ឆ្នាំ២០២៥ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានបង្ហាញនូវការគាំទ្រចំពោះឆន្ទៈរបស់សមាគមជប៉ុន-កម្ពុជា ដែលបានលើកទឹកចិត្តឱ្យមានការពិភាក្សាស៊ីជម្រៅបន្ថែមទៀត លើកិច្ចការរៀបចំយន្តការផ្សារភ្ជាប់ SMEs ជប៉ុន ជាមួយកម្ពុជា តាមរយៈការពិភាក្សាជាមួយក្រសួងស្ថាប័ន ដែលពាក់ព័ន្ធដើម្បីឱ្យការរៀបចំយន្តការនេះ កាន់តែគ្រប់ជ្រុងជ្រោយ និងអាចលេចជារូបរាងឡើង នាពេលខាងមុខ។

ឯកឧត្តម វង្សី វិស្សុត ក៏បានជំរុញឱ្យសមាគមជប៉ុន-កម្ពុជា ខិតខំប្រឹងប្រែងបន្ថែម ក្នុងការរៀបចំកម្មវិធីផ្សេងៗ ដើម្បីផ្គូផ្គងអាជីវកម្ម និងវិនិយោគិនកម្ពុជាជប៉ុន ជំរុញវិនិយោគិនជប៉ុន ឱ្យមកចាប់យកឱកាសអាជីវកម្ម និងវិនិយោគនៅកម្ពុជា ជាពិសេសក្នុងវិស័យឧស្សាហកម្មប្រតិគមន៍ ព្រមទាំងវិស័យផ្សេងៗទៀត ដែលមានតម្លៃបន្ថែមខ្ពស់ក្នុងខ្សែច្រវាក់ផលិតកម្ម ដែលមានស្រាប់។ តារយៈកម្មវិធីផ្គូផ្គងវិនិយោគិនកម្ពុជាជប៉ុន ឯកឧត្តម វង្សី វិស្សុត ជំរុញឱ្យសមាគម គាំទ្រដល់វិនិយោគិនកម្ពុជា ទៅវិនិយោគ ឬចាប់ដៃគូពាណិជ្ជកម្មជាមួយក្រុមហ៊ុនជប៉ុនផងដែរ ដើម្បីបង្កើតឱកាសសម្រាប់ការផ្លាស់ប្តូរបទពិសោធទៅវិញទៅមក និងកាត់បន្ថយគម្លាតផ្នែកជំនាញ ការគ្រប់គ្រង និងហិរញ្ញវត្ថុ៕