ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ជំរុញឱ្យសមាគមជប៉ុន-កម្ពុជា ក៏ដូចជាអង្គការដៃគូ បន្តផ្តល់ការគាំទ្រដល់ការអភិវឌ្ឍជីវភាពរបស់ប្រជាពលរដ្ឋនៅតាមសហគមន៍តំបន់ការពារធនធានធម្មជាតិ ដើម្បីធានាបាននូវលំនឹងសេដ្ឋកិច្ចគ្រួសារ តាមរយៈប្រាក់ចំណូលប្រចាំថ្ងៃពីមុខរបរបន្ថែម ដែលបានមកពីការវិនិយោគផ្ទាល់ និងការវិនិយោគបៃតង។

ក្នុងជំនួបជាមួយឯកឧត្តម TAKAHASHI Fumiaki ប្រធានសមាគមជប៉ុន-កម្ពុជា កាលពីថ្ងៃទី៣១ ខែមីនា ឆ្នាំ២០២៥ ឯកឧត្តមបណ្ឌិត អ៊ាង សុផល្លែត ក៏បានលើកឡើងពីការចូលរួមចំណែករបស់សមាគមជប៉ុន-កម្ពុជា ក្នុងការជំរុញឱ្យមានអ្នកវិនិយោគជប៉ុនមកកាន់កម្ពុជា និងបានគាំទ្រដល់កម្ពុជាឆ្ពោះទៅការអភិវឌ្ឍប្រកបដោយចីរភាព។

ជាមួយគ្នានេះ ឯកឧត្តម TAKAHASHI Fumiaki បានបញ្ជាក់ថា ក្រុមហ៊ុន ក៏ដូចជាសប្បុរសជនជប៉ុនជាច្រើនទៀត នឹងនាំយកមកនូវបច្ចេកវិទ្យា និងការគាំទ្រដល់កម្ពុជា ដែលចូលរួមលើកកម្ពស់ការងារដល់ប្រជាពលរដ្ឋ និងការការពារបរិស្ថាននៅកម្ពុជាផងដែរ៕