ភ្នំពេញ៖ ឧកញ៉ា លឹម សុជាតិ អនុប្រធានសភាពាណិជ្ជកម្មកម្ពុជា និងលោក លាវ ស៊ូអ៊ី អគ្គនាយករងនៃ អគ្គលេខាធិការដ្ឋាន នៃកិច្ចប្រជុំកំពូលធុរកិច្ចនិងវិនិយោគចិន - អាស៊ាន (CABIS) ពិភាក្សាអំពីស្ថានភាព និងសក្តានុពលវិនិយោគលើវិស័យបច្ចេកវិទ្យា AI អណ្តូងរ៉ែមាស ការកែច្នៃម្ហូបអាហារ និងភេសជ្ជៈនៅកម្ពុជា។

ក្រៅពីវិស័យខាងលើ ភាគីទាំងពីរ ក៏បានជជែកពីសក្តានុពលវិនិយោគលើវិស័យសុខាភិបាល ការថែទាំសុខភាព ភស្តុភារកម្ម និងចំណីសត្វនៅកម្ពុជា ផងដែរ។ ក្នុងជំនួប កាលពីថ្ងៃទី ២៨ ខែមីនា ឆ្នាំ២០២៥ លោក លាវ ស៊ូអ៊ី ក៏បានលើកឡើងពីការផ្សព្វផ្សាយប្រមូលធាតុចូល និងស្នើសុំការគាំទ្រ ពីសភាពាណិជ្ជកម្មកម្ពុជា ក្នុងការរៀបចំកិច្ចប្រជុំកំពូលធុរកិច្ចនិងវិនិយោគចិនអាស៊ាន លើកទី២២ នៅប្រទេសចិន។

ក្នុងឱកាសនេះ លោក លាវ ស៊ូអ៊ី បានអញ្ជើញសមាជិកសភាពាណិជ្ជកម្មកម្ពុជា ដើម្បីចូលរួមកិច្ចប្រជុំកំពូលធុរកិច្ចនិងវិនិយោគចិន - អាស៊ាន លើកទី២២ ដែលនឹងប្រព្រឹត្តទៅនៅទីក្រុងណានីង ប្រទេសចិន នៅខែកញ្ញា ទៀតផង។ នេះបើតាមការចុះផ្សាយរបស់ សភាពាណិជ្ជកម្មកម្ពុជា កាលពីថ្ងៃទី២៨ ខែមីនា ឆ្នាំ២០២៥៕