ភ្នំពេញ៖ ក្រសួងពាណិជ្ជកម្ម លើកទឹកចិត្តដល់ផលិតករខ្មែរឱ្យបន្តខិតខំពង្រឹងគុណភាព សុវត្ថិភាព សោភណភាព ការវេចខ្ចប់ និងការកសាងម៉ាកសញ្ញា ដើម្បីពង្រឹងភាពប្រកួតប្រជែងផលិតផលនៅលើទីផ្សារ។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី២៧ ខែមីនា ឆ្នាំ២០២៥។

ក្នុងសិក្ខាសាលាស្តីពី «ការលើកកម្ពស់ផលិតផលខ្មែរ» ឯកឧត្តម កៅ កោសល អនុរដ្ឋលេខាធិការក្រសួងពាណិជ្ជកម្ម និងលោក រុន សារី អភិបាលរងនៃគណៈអភិបាលខេត្តពោធិ៍សាត់ ក៏បានជំរុញ និងលើកកម្ពស់ផលិតផលខ្មែរ ដើម្បីចូលទីផ្សារក្នុង និងក្រៅប្រទេសផងដែរ។

ក្នុងសិក្ខាសាលាកាលពីថ្ងៃទី២៥ ខែមីនា ឆ្នាំ២០២៥ ក៏មានការចូលរួមពីរដ្ឋបាលខេត្ត មន្ទីរ អង្គភាពពាក់ព័ន្ធ សភាពាណិជ្ជកម្មខេត្ត ក្រុមហ៊ុន សហគ្រាស សហគមន៍ សមាគម ផលិតករ អាជីវករ និងនិស្សិតក្នុងខេត្តពោធិ៍សាត់ផងដែរ៕