ភ្នំពេញ៖ ក្រសួងពាណិជ្ជកម្ម និងធនាគារអភិវឌ្ឍន៍អាស៊ី (ADB) ជួបពិភាក្សាអំពីការគាំទ្រ ឬជំនួយបច្ចេកទេស លើប្រធានបទពាណិជ្ជកម្ម និងការប្រែប្រួលអាកាសធាតុ ដែលជាផ្នែកមួយនៃគម្រោងប្រចាំតំបន់របស់ ADB ដើម្បីលើកកម្ពស់ការប្រកួតប្រជែងពាណិជ្ជកម្ម និងការទាក់ទាញការវិនិយោគរបស់កម្ពុជា។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី២៦ ខែមីនា ឆ្នាំ២០២៥។

ក្នុងជំនួបនេះ លោក Julian Clarke ជំនាញការជាន់ខ្ពស់ប្រចាំតំបន់របស់ ADB និងលោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម ក៏បានពិភាក្សាអំពីសកម្មភាពគោលនយោបាយដែលត្រូវអនុវត្តក្រោមកម្មវិធីពាណិជ្ជកម្ម និងការប្រកួតប្រជែង ដើម្បីលើកកម្ពស់បរិយាកាសអំណោយផលសម្រាប់ការវិនិយោគ ធុរកិច្ច ការកែលម្អគោលនយោបាយពាណិជ្ជកម្ម និងការសម្របសម្រួលពាណិជ្ជកម្មផងដែរ៕