ភ្នំពេញ៖ ឯកឧត្តមបណ្ឌិត កៅ ថាច អគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) បានបញ្ជាក់ថា ធនាគារ ARDB ស្វាគមន៍សម្រាប់ការផ្តល់ឥណទានតម្លៃសមរម្យមានអត្រាការប្រាក់ទាបប្រមាណ ៧%ក្នុង១ឆ្នាំ ដល់ប្រជាពលរដ្ឋទាំងក្នុងនិងក្រៅសហគមន៍ ដែលមានឆន្ទៈពិតប្រាកដ ដោយចង់ពង្រីកការចិញ្ចឹម និងដាំដុះ។ ឯកឧត្តម កៅ ថាច លើកឡើងបែបនេះក្នុងការចុះផ្សព្វផ្សាយឥណទានដល់ក្រុមសហគមន៍នៅស្រុកស្ទោង ខេត្តកំពង់ធំ។

នាឱកាសជួបសំណេះសំណាលជាមួយប្រជាកសិករក្នុងសហគមន៍ដាំបន្លែ ផ្ទះសំណាញ់ និងសហគមន៍ចិញ្ចឹមមាន់ កាលពីថ្ងៃទី២៥ ខែមីនា ឆ្នាំ២០២៥ ឯកឧត្តមបណ្ឌិត កៅ ថាច លើកឡើងថា ធនាគារ ARDB មានគោលបំណងចង់ផ្តល់ជូនឥណទានដល់ប្រជាពលរដ្ឋដែលចង់បានទុនយកទៅធ្វើអាជីវកម្មពិតប្រាកដ។

ឯកឧត្តមបណ្ឌិត កៅ ថាច បានបន្តថា ការដែលសហគមន៍និងអ្នកចិញ្ចឹមសត្វទទួលបានឥណទានទៅបង្កើតមុខរបរពិតប្រាកដ ដូចជាបង្កើតចំណូលមូលដ្ឋាន គឺបានជួយចូលរួមចំណែកយ៉ាងធំ ក្នុងការបង្កើតការ ផ្តល់ប្រាក់ចំណូលពលរដ្ឋ និងកាត់បន្ថយចំណាកស្រុកថែមទៀតផង។ ជាមួយគ្នានេះ ឯកឧត្តមបណ្ឌិត កៅ ថាច ក៏បានចុះពិនិត្យនូវទីតាំងកន្លែងកសិដ្ឋានរបស់ ក្រុមហ៊ុន Made for This ដែលចិញ្ចឹមត្រីតាមប្រព័ន្ធទឹកវិលជាប្លុក (IPRS) និងក្រុមចិញ្ចឹមកង្កែប ភ្ញាស់កូនកង្កែប និងចិញ្ចឹមកង្កែបសាច់ ប្រមាណ២០គ្រួសារ ស្ថិតក្នុងស្រុកប្រាសាទបាគង ខេត្តសៀមរាបផងដែរ។ នេះបើតាមការចុះផ្សាយរបស់ ARDB កាលពីថ្ងៃទី២៥ ខែមីនា ឆ្នាំ២០២៥៕