ភ្នំពេញ៖ ឯកឧត្តមបណ្ឌិត សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា ស្នើឱ្យនិសិ្សតកម្ពុជា ដែលទទួលបានអាហារូបករណ៍រដ្ឋាភិបាលជប៉ុន ឆ្នាំ២០២៥ (MEXT Scholarship for 2025) ក្នុងអំឡុងពេលបំពេញបេសកកម្មសិក្សា និងស្រាវជ្រាវ ត្រូវដើរតួជាភ្នាក់ងារទូតផ្សព្វផ្សាយសក្តានុពលកម្ពុជា ដល់សហគមន៍ដែលខ្លួនរស់នៅ ដើម្បីជំរុញវិនិយោគិនមកវិនិយោគ ឬមកទស្សនាកម្ពុជា។

ឯកឧត្តមបណ្ឌិត សរ សិនិរ៉ា លើកឡើងអំពីបេសកកម្ម និងចក្ខុវិស័យរបស់ ក្រុមប្រឹក្សាអភិវឌ្ឍន៍កម្ពុជា ក្នុងនាមជាសេនាធិការ និងជាច្រកចេញចូលតែមួយរបស់រាជរដ្ឋាភិបាល លើការងារគ្រប់គ្រងការវិនិយោគឯកជន និងតំបន់សេដ្ឋកិច្ចពិសេស ដែលបាននិងកំពុងបន្តខិតខំជំរុញការកែលម្អ ធ្វើឱ្យប្រសើរឡើងនូវបរិយាកាសធុរកិច្ច និងការវិនិយោគ ពិសេសការធ្វើឌីជីថលរូបនីយកម្ម ក្នុងការផ្តល់សេវាជូនវិនិយោគិន។ ឯកឧត្តមបណ្ឌិត សរ សិនិរ៉ា មានប្រសាសន៍ដូច្នេះ ក្នុងឱកាសជួបសំណេះសំណាល ជាមួយក្រុមនិស្សិតជ័យលាភីអាហារូបករណ៍រដ្ឋាភិបាលជប៉ុន កាលពីថ្ងៃទី២១ ខែមីនា ឆ្នាំ២០២៥។

ឯកឧត្តមបណ្ឌិត សរ សិនិរ៉ា ក៏បានចែករំលែកពីបទពិសោធផ្ទាល់ខ្លួនអំពីការសិក្សា និងការងារ ក្នុងអំឡុងពេល ឯកឧត្តមបណ្ឌិត ស្នាក់នៅក្នុងប្រទេសជប៉ុនក្នុងនាមជាអតីតនិសិ្សតអាហារូបករណ៍ ដល់ក្រុមនិស្សិត ដើម្បីជាគតិសម្រាប់ពិចារណាក្នុងឱកាសសិក្សានៅប្រទេសជប៉ុន និងត្រៀមខ្លួនសម្រាប់ឱកាសការងារ នាពេលអនាគត៕