ភ្នំពេញ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានចូលរួមពិភាក្សាពីការរក្សាការវិនិយោគទេសចរណ៍អំឡុងពេលនៃបញ្ហាភូមិសាស្ត្រនយោបាយ និងអស្ថិរភាពសេដ្ឋកិច្ច ពិសេសការជំរុញកិច្ចសហប្រតិបត្តិការអន្តរជាតិ និងកិច្ចសន្ទនាកាន់តែច្រើនតាមរយៈទេសចរណ៍។

កិច្ចប្រជុំកំពូលរដ្ឋមន្រ្តីទេសចរណ៍ (Minister’s Summit) ក្រោមប្រធានបទ៖ «ការធ្វើឱ្យប្រសើរឡើងនូវការវិនិយោគ ធានាបាននូវសន្តិភាព៖ ពង្រឹងកំណើន សម្រួចអនាគត» រដ្ឋមន្រ្តីទេសចរណ៍មកពី ២៤ប្រទេស និងថ្នាក់ដឹកនាំទេសចរណ៍ពីប្រទេសផ្សេងៗទៀត សរុបប្រមាណ ៥០ប្រទេស បានជជែកអំពីបញ្ហាប្រឈម និងឱកាសនៃវិស័យទេសចរណ៍សកលលោកសំខាន់ៗ ស្របតាមនិន្នាការណ៍ទេសចរណ៍ និងសភាពការណ៍ពិភពលោក។

ក្រៅពីប្រធានបទខាងលើ ភាគីចូលរួម ក៏បានលើកឡើងពីប្រធានបទសំខាន់ៗផ្សេងទៀត ដូចជាការពង្រឹងសន្តិភាព ដែលជាមូលដ្ឋានគ្រឹះសម្រាប់ការវិនិយោគលើវិស័យទេសចរណ៍ និងការអភិវឌ្ឍន៍ប្រកបដោយនិរន្តរភាព ព្រមទាំងតួនាទីរបស់វិស័យទេសចរណ៍ក្នុងការលើកកម្ពស់ការកសាងសន្តិភាពសកល និងការដោះស្រាយជម្លោះផងដែរ។ នេះបើតាមការចុះផ្សាយរបស់ក្រសួងទេសចរណ៍ នាថ្ងៃទី៧ ខែមីនា ឆ្នាំ២០២៥៕