ក្រសួងកសិកម្ម បានរៀបចំកម្មវិធី«កសិកម្ម វាលបៃតង» ដើម្បីបង្ហាញពីផលិតផលកសិកម្មដែលមានសក្ដានុពលរបស់កម្ពុជា នៅទីស្តីការក្រសួងកសិកម្ម រុក្ខាប្រមាញ់ និងនេសាទ នាល្ងាចថ្ងៃទី០៨ ធ្នូម្សិលមិញ។ ក្នុងកម្មវិធីនេះ មានតាំងពិព័រណ៍ផលិតផលកសិកម្មពីសហគ្រាសជាច្រើន ដូចជាផលិតផលកែច្នៃ, បន្លែផ្លែឈើ និងម្ហូបអាហារផលិតពីផលិតផលខ្មែរ ដែលមានគុណភាពផងដែរ។

កម្មវិធី«កសិកម្ម វាលបៃតង» ដែលមានសាធារណជន, ភ្ញៀវជាតិ-អន្តរជាតិ, អង្គទូន និងតំណាងដៃគូអភិវឌ្ឍបានចូលរួមផងនោះ មានរៀបចំបង្ហាញអំពីការដាល់អំបុក ដែលជាផ្នែកមួយនៃវប្បធម៌ផ្សារភ្ជាប់នឹងវិស័យកសិកម្មដំណាំស្រូវក្រោយប្រមូលផល។ ឯកឧត្តម ឌិត ទីណា រដ្ឋមន្ដ្រីក្រសួងកសិកម្ម បានថ្លែងនាឱកាសកម្មវិធី«កសិកម្ម វាលបៃតង» ថា ក្រសួងនឹងរៀបចំឱ្យមានកម្មវិធីបែបនេះទៀត ហើយអាចនឹងមានរយៈពេលច្រើនថ្ងៃផងដែរ៕